Simu l’11 di marzu, in traccia di compie a reddazzione di ssu 2598u nùmaru d’Arritti. Mi rivènenu in mente stampe dulurose è spaventose 8 anni fà. U mare grossu s’alza à l’orizonte è corre à una vitezza tremenda versu e sponde, in dui cavallate sin’à 6 metri d’altezza… U tempu di prevene a ghjente ùn hè bastatu. 18.500 personi anu persu a vita in u tsunamì chì s’hè annigatu a costa di Fukushima. Solu 15.897 salme sò state ritruvate. Tutt’ugnunu hà in capu ss’imàgine di l’acqua chì si strughje tuttu strascinendu case, vitture, battelli, àrburi, cose da tutte e mamme. È ghjente da tutte l’età, ciucci, zitelli, personi maiò, personi anziane, animali, ricchi o pòveri, a putenza di a natura ùn risparmia à nimu.
U terramotu hè statu frà i più tremendi di a stòria di u Giappone, cù più di 9 nant’à a scala di richter.
U livellu u più altu mai arregistratu. Èranu 2 ore è 46 minuti dopu meziornu quandu un sfundamentu sottumarinu, hà datu nàscita à un Tsunamì distruttore. A disgrazia puru, ùn si pianta quì. E misure di prutezzione di a Centrala nuclearia di Fukushima ùn èranu previste per una catastrofa smisurata cum’è quessa. Si ròmpenu. L’acqua entre dapertuttu, si strughje u sistema chì rifrida u cumbustìbule, è pruvucheghja disguasti maìo in a struttura di i sfarenti reattori. L’esperti sanu digià ch’hè accadutu una catastrofa è chì nimu ùn pò più impedisce e so cunsequenze tremende. E barre di cumbustìbuli à u cuntattu di l’acqua pruvuchèghjanu vapore è u tuttu finisce in una doppia splusione.
Pò un antra. I radiunecleidii sò cappiati ind’è l’ària. Più di 3700 morti saranu torna cuntabilizati e settimane dopu à a catastrofa, trà ghjente ferite ch’ùn si ponu evacuà abbastanza in furia, è e prime vìttime di a disgrazia nuclearia.
8 anni dopu, a situazione hè sempre pèssima è ùn si sà ancu cumu sòrtenne. E tunnellate di terra cuntaminata è impachittata, e millaie di cisterne d’acqua impuzzichita, è tutta l’acqua torna partuta in mare à cuntaminà l’oceanu, tutte e cose umane ghjunte scarti nuclearii, vitture, mòbuli, scialbi, ferrami… Ma u peghju ferma u famosu corium. Vale à dì u cumbustìbule radiuattivu, chì s’hè struttu è hà viaghjatu sottu à i reattori, à le volte sott’à a centralla, tufunèndusi l’astracu è sparghjèndusi sottu terra… Dapoi tutte st’annate i più grandi specialisti mundiali anu travagliatu à fabricà i robbò capace d’avvicinà ssu corium d’una radiuattività cusì pèssima chì l’omu ùn pò avvicinassi è ch’ella mette in panna e màcchine e più perfezziunate. Ci volerà annate è annate per ghjunghje à chjappalu. Pò dopu… ci volerà à inventà u modu di trattalu. Spaventu.
Fabiana Giovannini.
