Eleie trà a Còrsica è e Mèriche sò numarose è anziane, ricullendu à a scuperta di u novu mondu da Cristòfanu Culombu o, più credibilmente, à Paoli Paoli. Ùn si tratta micca solidamente di a ghjunta di Corsi per isse Mèriche, ci sò dinù Mericani chì vènenu in Còrsica. U Cullochju s’intaressa dunque à e rilazione trà sti lochi sicondu trè parte : Da Cristòfanu Culombu à Pasquale Pàoli, da Napulione u Primu à Napulione u Terzu è, infine, da Napulione u terzu à l’oghjincu. A prima cunferenza hè data da Michel Vergé- Franceschi : u studiu di e fonte dispunìbile permette d’accertà chì Culombu era natu in Gènova, è micca in Calvi, malgratu e pretensione di a cità semper fidelis.
E prime testimunianze di a Còrsica ind’a storia di a Mèrica sò liate à a fama di Paoli. A stampa mericana, pè un dettu, mintuva parechji brìndisi fatti in l’onore di u Babbu di a Pàtria è di i Corsi (« brave Corsicans »). U fattu si stà chì James Boswell t’hà visitatu a Còrsica d’ottobre 1765, è n’hà resu un umagiu tremendu. Ind’u novu mondu, c’èntrenu dinù l’Antille, è ci tocca à ramintà à Jean-Noël de Gentile chì hè à l’orìgine d’una vera dinastia corsa ind’a Martìnica.
Ind’a siconda parte, ci hè da nutà chì Napulione avia pinsatu à fughje per isse Mèriche, da ùn esse esiliatu in Sant’Elena. Ma per quessa, sarebbe statu ubligatu di piattassi ind’un battellu, ciò chì averebbe arruinatu a so màghjina d’imperatore tercanu. Di 1861, u Prìncipe Napulione, dettu « Plon-Plon », si rende in Amèrica è in Canadà. Palesa u so estru curiosu per tuttu ciò ch’ellu scopre ind’un ghjurnale chì ci sò e so emuzione, e so idee, e so faccende. Dichjara : «Ce séjour devient ennuyeux. Il me fait faire des réflexions sur ce pays qui est beau, mais qui ne retrace aucun souvenir, et ne porte l’empreinte d’aucun événement remarquable, est par-là bien inférieur à nos pays historiques. » À u cuntrariu, li piace u Canadà : ci si trova « quelques échantillons d’art, qui me manquent si complétement depuis que je suis en Amérique, (et qui) me font un bien vif plaisir et me reposent l’esprit. »
Infine, ind’a terza parte, vidimu e case «mericane » di sti Corsi vultati ricchi ricchoni da e Mèriche, è chì fàcenu custruisce case tamante. Ma ci vole à fà a sfarenza cù i casali di a burghesia corsa chì s’assumiglièghjanu, vistu chì l’architetti è i maestri èranu i listessi.
Eccu un libru d’intaressu maiò chì si compie cù un viaghju di liceani curtinesi in Paoli City mantenendu viva a leia trà a Còrsica è e Mèriche.
Marina Chovin.
