Hè l’ìsula a più suttana d’Italia. U so rinommu li vene di a so vicinanza cù u cuntinente africanu, à menu di 130 chilòmetri di a Tunisia, 160 di l’ìsula di Malta, un pocu menu di 280 di a Libia. Ìsula di piscadori cù i so 6.000 abitanti, Lampedusa campa dunque di pesca è di turìsimu. Ma disgraziosamente, u mondu a cunnosce per via d’un drama tremendu, postu ch’ella ferma dapoi u principiu di l’annate 90 un purtone di l’Auropa pè i migranti è ch’ella vede incagliassi nant’à e so sponde centinaie di disgraziati chì fùghjenu a misèria è a guerra in Àfrica. Si stima à decine di millaie a ghjentarella chì parvene sin’à l’ìsula per chede asìliu, cum’è primu pezzu di terra di l’eldorado aurupeu. È frà sse milliaie di disgraziati, solu qualchi centinaia truverà un avvene. L’altri si ritròvanu morti nant’à a rena di Lampedusa, ingulliti da u mare ghjuntu a so sepultura, o rimandati in u so paese d’urigine.
L’8 di lugliu 2013, u papa Francescu face u so primu viaghju in Lampedusa per dinunzià « a vergogna » di ssi migranti morti in mare, per via di « a mundialisazione di l’indifarenza ». « Sò ghjuntu à prigà » avia dettu papa Francescu, « ma dinù per sveglià e cuscenze ».
Trè mesi dopu, u 3 d’ottobre, si sfonda un boat people à u largu di Lampedusa ch’arricoglie e so salme nant’à e so sponde. A catastrofa face 366 morti, per quelli ch’anu pussutu esse truvati… ferma u naufragiu u più tremendu accadutu ma sò centinaie à more ogni annu.
Stu 4 di lugliu di u 2026, un antru papa, Leone XIV, face un viaghju in Lampedusa. A so siluetta bianca, sola, mezu e petre di Lampedusa, franchendu u munumentu di a porta di l’Auropa dedicatu à i migranti morti, hà qualcosa di sprezzante à tempu in a simbòlica di a disgrazia umana è di u lascia corre è l’abbandonu di l’Auropa di ssa ghjentarella. « Una cuscenza umana, è ancu di più una cuscenza cristiana ùn pò firmà indiferente di pettu à e vìttime di l’annegu è u mancu d’aiutu, à ssi campusanti di u mare » hà dettu u papa, allora ch’ella chjode un pocu di più e so fruntiere l’Auropa cù pulìtiche migratorie più strinte. « L’Auropa hà di chè risolve a crisa di manera orgànica, scrivendu i primi succorsi in un pianu stratègicu di longu andà, capace d’accoglie, di prutege, di prumove è d’integrà migranti travagliendu in u stessu tempu à u sviluppu da chì nimu ùn sia cundannatu à migrà » hà dettu papa Leone in un messagiu pulìticu chì hà cundannatu torna a corruzzione è u sistema ecunòmicu mundiale chì crea a puvertà è l’esclusioni in i paesi di i migranti, è u cumerciu urganizati da criminali chì prufìttanu di ssa situatione per fà soldi.
Spàrtesi e rispunsabilità per urganizà l’accolta per quelli chì bràmanu di custruìscesi un avvene in Auropa, è à tempu dassi di rimenu per porghje sviluppu à l’Àfrica : l’Auropa ùn manca nè di soldi, nè di valori, nè di piazza per fala finita cù ssu scàndalu umanitariu.
Si stima à 84.000 i morti in Meditterràniu dapoi u 2014, secondu l’Organisazione Internaziunale di e Migrazioni. Sò state ritruvate e salme di 35.000 personi nant’à e strade di migrazione versu l’Auropa, a strada a più murtale essendu a strada di u Mediterràniu centrale cù quasi 27.000 morti dapoi u 2014.
Lampedusa hè à tempu u sìmbulu di un drama spaventosu, è d’una sulidarità magnìfica da salvà vite. Dèmuci di rimenu. •
