Eccu una spressione pròpiu corsa, dice Farrandu Ettori. Partuti da a ghjesgia San’Ghjuvanni di Càrbini (da induve vene u so nome) à u XIVu sèculu, i Ghjuvannali si spàrghjenu in tutta a Corsica è sò reprimati in u sangue cù una spedizione militare. « Funu minati è sparsi è dapertuttu induv’elli èranu ricunnisciuti, èranu massacrati senza pietà. Da tandu vene sempre ancu oghje, quand’omu parla di certi chì sò perseguitati sin’à a morte cù tutta a so famiglia, u parangone : sò stati trattati cum’è i Ghjuvannali ». Cusì dice Giovanni della Grossa, un gazzetistu di l’èpica di i Ghjuvannali. Ciò ch’ellu scrive Giovanni della Grossa hè sempre veru ancu oghje, dice Farrandu Ettori in a so Antulugìa di e spressioni corse. Si sèntenu sempre spressioni cum’è : li n’anu fattu quand’à i Ghjuvannali, o torna : l’ani stirpati com’è i Ghjuvannali. •
