In 2025, un raportu senaturiale d’evaluazione di a lege Paul Molac chjamava à riagisce di fronte à u perìculu di sparizione di e lingue regiunale. Senza un azzione forte, « sse lingue averanu quasi smaritu da quì à una o duie generazioni » dìcenu i senatori Max Brisson è Karine Daniel… U raportu alerta frà altru nant’à a fragilisazione di l’insignamentu immersivu ch’hè statu dichjaratu anticustituziunale ma ch’hà trovu mezu d’esse mantenutu per vìa d’un argutezza di u guvernu ch’hà publicatu, di pettu à a còllera di sse scole, una circularia per scuntorce i cusì detti « savvii di a Repùblica » è permette à e scole immersive di cuntinuà d’esiste. A custruzzione hè gambistorta ma, pianamente è bè, e scole cuntinuèghjanu à funziunà è à sviluppassi.
In ssu cuntestu, a federazione Scola Corsa, ùltima creazione di u retale Eskolim di e scole assuciative d’insignamentu immersivu in lingua regiunale, prova à custruisce un mudellu d’insignamentu ch’hà fattu e so prove in Francia, in Auropa è in u mondu. Porghje cusì non solatimente un prò pè a nostra lingua chì si rinvivisce in bocca à i zitelli, ma dinamizeghja dinù l’insignamentu cù l’avvicinenza è l’efficacità di a so pedagugìa : maestre è insignanti vicini assai di i zitelli, parenti impegnati, mondu ecunòmicu chì sustene, apertura nant’à a cultura è a vita di a sucietà corsa per vìa di e numarose attività urganizate in u perisculare…
Malgratu e prugressioni di l’insignamentu bislinguu, è ancu di l’insignamentu immersivu quand’ellu hè urganizatu à u senu di l’Educazione naziunale, a calata brutale di l’imparera à u livellu di u secundariu arruina tutti i sforzi fatti in u primariu.
A sola vera è bona risposta tandu, ferma l’insignamentu assuciativu cum’elle u spàrghjenu e scole di u retale Eskolim. Scola Corsa per un dettu, piglia i ciucci chjuchi chjuchi quand’elli sò pulliti, à 2 anni è mezu/3 anni, è i seguiterà sin’à u liceu è à u basciglie omancu… Ogni annu, s’aghjùstanu à tempu à siti sculari novi, i livelli seguenti pè u zitellu chì ferma cusì in un ambiente immersivu sanu. Sò zitelli chì fàcenu a so scularità inseme, chì sò seguitati di manera acuta, è in più accumpagnati da i parenti chì s’impègnanu in a vita è l’animazioni di a scola. E scole immersive assuciative sàlvenu e lingue regiunale, ma dinù custruìscenu donne è omi ch’averanu dumane un attenzione forte pè u so paese, a so stòria, a so cultura.
Tutte e sperienze mòstranu chì l’elevi sò in rièscita sculare, ma dinù in a so vita.
L’insignamentu immersivu hè a salvezza di e nostre lingue in un mondu mundializatu è uniformizatu chì l’arruìnanu di fatti. Sta salvezza identitaria chjama à esse sustenuta è valurizata. Sciaccamanemu à tutti quelli chì s’impègnanu ! Forza à Scola Corsa è à tutte e so squadre ! Hè a più bella rièscita pulìtica di st’ùltimi anni pè a Corsica. •
