L’Òrdine suvranu di Malta hè frà i più vechji urganìsimi caritativi di u mondu. Hà 1000 anni di stòria. Hè natu in Jerusalem in tempi di e Cruciate, cù a creazione d’un uspidale per accoglie à nome di a carità cristiana tutti i pellegrini trastanchi da un longu viaghju. A so azzione si trasporta dopu, à custruisce cù ghjesgie, uspidali pè i malati è ospìzii pè i disgraziati è l’urfanelli, in Cìpria, Rhodes, Malta, Roma induv’ellu s’impianta sin’à oghje. L’Òrdine hè statu ufficialmente ricunnisciutu in 1113 da u Papa Pasquale II. Conta 120.000 membri trà salariati è benevulenti in 120 paesi in u mondu, hà e so pròpie stituzioni, una Custituzione è intratene rilazioni diplumàtiche cù 110 paesi.
L’Òrdine di Malta Francia hè un associu cattòlicu ricunnisciutu d’utilità pùblica dapoi u 1928. 13.000 benevulenti s’impègnanu in 100 delegazioni è p`ù, frà e quale a Corsica. L’Òrdine di Malta Francia agisce dinù ind’è 36 paesi per accumpagnà a pòvera ghjente, cù azzioni di sulidarità è di succorsu, à u senu d’accasamenti medicali è suciali. L’associu aiuta i più dèbbuli, i migranti, i precarii ma dinù aiuta à l’urganisazione di grandi evenimenti spurtivi.
Benevulenti prufessiunali di a salute accumpàgnanu dinù i malati in 13 stabilimenti di salute. À l’internaziunale, l’Òrdine di Malta Francia accura i malati di a lepra, di u sidà, a tuberculosa, u paludìsimu.
S’impegna à succore e mamme in difficultà è i so ciucci, e vìttime di e guerre, di e catastrofe naturale, è tutta a ghjente in u bisognu.
In 2020, l’Òrdine s’hè mubilizatu contr’à a crisa di a Covid-19. Hà datu di manu in i centri di vistichera è di vaccinazione, o accumpagnendu i malati in i trasporti sanitarii è distribuendu aiutu alimentariu.
S’incaricheghja à pro di a persona in tutte e so dimensioni, fìsiche, suciale, medicale, spirituale, senza fà casu di a so urìgine, a so religione o a so naziunalità. Fà fronte à tutte e suffrenze in u rispettu di a vita è di a dignità umana cù u cummandamentu : Tuitio Fidei et Obsequium Pauperum. Vale à dì nutrisce, testimugnà è prutege a fede (Tuitio Fidei) è serve i pòveri è i malati (obsequium pauperum).
L’Òrdine in Corsica hè raprisentatu da l’associu Corse-Malte, creatu in u 1986 da Huguette Orsatelli, è ricunnisciutu d’utilità pùblica. Rege un accasamentu di cura à l’anzianu uspidalu di Toga in Bastia, battizatu Centru di cura André è Huguette Orsatelli, induve mèdichi è infirmieri benevulenti assicurèghjanu una permanenza cù cunsultazioni di medicina generale, dentàrie, di cardiologìa, podologìa, farmacìa. Travaglia cù d’altri associ cum’è A Fratellanza. « Avemu 1500 cartulari medicali aperti. Dapoi più di 10 anni, Corse-Malte s’impegna appressu à sse persone chì si sò ritruvate senza cupertura suciale. Simu à u serviziu di i più pòveri, di quelli in màrgine di a sucietà, disgraziosamente sò numarosi »dicìa in 2021 a delegata di Bastia Maria Claudia Filippi.
Oghje, Corse-Malte lampa una chjama à sustegnu da pudè finanzà e so azzioni. Chjama dinù i persunali medicali chì ponu offre un pocu di u so tempu. L’associu assicureghja una permanenza tutti i luni, marti è ghjovi dopu meziornu à u nùmaru quì sottu*. •
Infurmazione : www.ordredemaltefrance.org
* Delegazione Bastia : 04 95 32 61 73
