Scola Corsa scumbatte dapoi parechji mesi per fà rispettà u drittu, vale à dì a lege Debré chì permette dapoi u 1959, di sparghje l’insignamentu privatu. Ne prufìttanu dapoi tandu e scole cunfessiunale (cattòliche o prutestante), ne prufìttanu dinù dapoi 60 anni e scole d’insignamentu immersivu di u retale Eskolim ch’adunisce e dimarchje d’insignamentu in lingua regiunale, in Paese bascu, in Brittagna, in Catalogna, in Occitania, in Alsazia.
A custituzione ricunnosce e lingue regiunale cum’è « patrimoniu » ma a stessa custituzione face tràmpalu cù u so famosu artìculu u francese hè lingua di a repùblica. In fatti, ghjè u cunsigliu custituziunale chì si ne ghjove per dì chì a sola lingua ufficiale hè u francese. Per l’altre lingue, ferma solu una tulleranza più o menu appiecata.
Vale à dì ogni volta ch’ellu ci hè bisognu di sparghje è spannà a lingua in scola o in a sucietà, a custituzione – o piuttostu u cunsigliu custituziunale chì face valè a so pròpia interpretazione – face ostàculu. Peghju, prova ancu à rinculà s’ellu hè pussìbule.
Cusì, ci serà sempre un ministru, un insignante, un puliticante, per rizzassi è marturià sse lingue.
Ghjè ciò chì si passa in stu mumentu cù Scola Corsa.
Hè ricunnisciuta cum’è scola, hà ottenutu a cuntrattualisazione (6 posti). Puru, u guvernu : 1/ ricusa ch’ella sia generalizata sta cuntrattualisation. 2/ attacca a suvvenzione di a Cullettività di Corsica sinamente data per parà ssu mancu di generalisazione.
I rispunsèvuli di Scola Corsa, l’eletti di tutte tendenze, è i rispunsèvuli di u Statu in Corsica – prefetti è rettore d’accademia – si sò intesi nant’à una surtita di crisa.
Basta solu l’accunsentu di u guvernu.
Invece u so silenziu tradisce l’intervenzione pulìtica di l’ussari neri di a repùblica cum’ellu scrive Arritti in pàgina 8 di stu presente nùmaru.
Millaie di ghjente in carrughju o à zifrà u Manifestu di sustegnu per Scola Corsa, più di 80 % di e cumune corse à deliberà per dà u so sustegnu, centinaie d’imprese à fiancu à sse scole, è dapoi parechji ghjorni, i parenti chì cundùcenu azzioni per dumandà stu famosu accunsentu… ùn ci hè nunda à fà.
Scola Corsa hè un sìmbulu chì dimostra chì a Corsica per rege i so prublemi hà bisognu d’un drittu specìficu è di fà e so pròpie lege ch’ùn puderanu più esse intravate da stu famosu artìculu primu di a custituzione. L’autunumìa hè a sola risposta chì ci permette di fà rispettà u nostru drittu.
Sciaccamanate à i parenti è à i rispunsèvuli di Scola Corsa. Cù elli salveremu a nostra lingua ! •
Per sustene e scole immersive di lingua corsa : scolacorsa.corsica
