Sò decine di millaie à esse stati ingannati da i puteri pùblichi dopu à a catastrofa di Cernobile è u nùvulu pùzzicu cusì dettu piantattu à a fruntiera… oghjeghjornu ùn si sà, è forse ùn si saperà mai, quantu sò stati i malati tocchi da a cuntaminazione radiuattiva. Ma omu pò fassi un edea, vistu u nùmaru di ghjente curata da e malatìe di a tiròida. Ùn saranu forse tutti caggiunati da Cernobile ma… a maiò parte sì. È sò millioni à piglià u famosu Levothyrox, u medicamente chì reguleghja a tiròida. Pensàvanu, i corci, pudè girà a pàgina d’un mumentu dulurosu di a so vita, a malatìa, l’uperazione, u trattamente, eppò infine e ghjuste misure di levothyrox truvate per aiutali à campà tutta a so vita cù ssu medicamente chì si sustituisce à u funziunamentu di a tiròida. Invece, nò, dopu à aveli cuntaminati è cundannati à curassi tutta a so vita, a sucietà cuntinueghja à ghjucassi di a so disgrazia ! I laburatorii farmaceutichi cuntinuèghjanu à marturiali. A formula di u Levothyrox hè stata cambiata senza prevèneli. È sò mondu à esse cascati malati torna !
17 000 personi anu fattu sapè parechji effetti secundarii gattivi. Fatica, pene in capu, pèrdita di capelli, giracapi, affocu, svègliula… certi sò morti.
Senza chì i soi sìppianu in capacità oghje di pudè purtà a prova chì a so morte hè in lea cù l’effetti secundarii di a nova formula di u medicamente.
Puru, averà ingattivitu u so statu di debbulezza, certi duttori a dìcenu. 7 000 lagnanze sò state poste l’ùltimi cinque mesi, è, infine, i puteri pùblichi, di pettu à tutta sta ghjente tocca, anu apertu un infurmazione ghjudiziaria u 5 di marzu scorsu.
Vale à dì chì e vìttime anu da pudè fassi sente, dumandà espertìzie medicale, è un ghjùdice di struzzione li sterà à sente. E lagnanze pàrlanu di « ingannu impeghjuritu », « ferita invuluntaria », «messa in perìculu di a vita d’altrui », è spèranu pudè mette in esame i rispunsèvuli di u laburatoriu Merck, è ancu a ministra di a saluta di l’èpica.
Secondu à l’associu «Campà senza a tiròida» sarèbbenu un millione i malati ch’anu piantatu l’utilisazione di u novu levothyrox per vìa di l’effetti secundarii ! Trè millioni di ghjente in Francia sò curati da u levothyrox! ! ! Vale à dì chè no simu di pettu à una vera crisa sanitaria. Dopu à avè nigatu, i puteri pùblichi s’inchiètanu anch’elli per vìa di u nùmaru criscente di malati. A quistione hè di sapè perch’è u laburatoriu hà cambiatu à so formula, allora ch’ellu ne sapìa u perìculu, postu chì ellu stessu hà prupostu di fà prese di sangue à i malati dopu à qualchi simana d’utilisazione di u novu levothyrox…
Fabiana Giovannini.
