Torna un bellìssimu cantu di Canta u Populu Corsu, frà i primi ch’ellu ci hà rigalatu u gruppu, chì offre un addattazione di u famosu « j’écris ton nom » di Paul Eluard, è canta a nostra brama di libertà. À tutti quelli chì ne màncanu.
Nant’à e neve di ritondu
Sopr’à u mare prufondu
E petre di l’alte cunfine
E rinaghje di e marine
Libertà !
Pè u cuccu è u culombu
Pè a chjama è u ribombu
Pè u fiore muntagnolu
U secretu macchjaghjolu
Libertà !
In l’anticu campu santu
Cù a santa croce accantu
In cima di u campanile
Nant’à u ceppu di u fucile
Libertà !
Sopr’à Tavignanu è Golu
Sparghje infine lu to volu
Pè u solcu pè a terra
Pè a lingua è a bandera
Libertà !
Poi per ogni patriottu
Oghje incarceratu à tortu
Per ogni generazione
Di a Corsica Nazione
Libertà ! •
