Stu mondu viaghja à capu in ghjò. I stùdii, e chjame di i scientìfichi, e riunioni da tutte e mamme, sèrie trà i putenti di a pianetta, e misure prumesse da piglià in fùria in fùria, e decisioni aduprate nant’à a rilucalisazione eculògica è suciale indispensèvule, è tuttu un trallalà, a manu nant’à u core per dì, quasi a làcrima à l’ochju, ci tocca à agisce ! tuttu què hè martellatu da a matina à a sera, nant’à e televisiò, e ràdio, i ghjurnali… è, in u frà tempu, si pìglianu decisioni sceme chì sguàssanu tutte e bone vulintà ! Stu 23 è 24 d’ottobre e cumissioni di u Parlamentu aurupeu sò chjamate à dibatte nant’à l’accordu di lìberu scàmbiu trà l’Unione aurupea è a Nouvelle-Zélande. Un mese dopu, à a sessione di nuvembre, ghjè u Parlamentu aurupeu chì darà u so parè. Ma u fattu solu di pensà ch’ellu si puderìa esse un accordu cumerciale cusì, và cumplettamente à l’incontru di tutte l’inchietùdine è e decisioni prese per dà di pettu à u riscaldimentu climàticu ! Dopu à avè cumbriculatu à l’appiattu di lugliu scorsu, l’accordu hè statu messu in ballu sott’à a pressione di i lobbì industriali è finanziarii à l’incontru di u mìnimu ghjudìziu ! L’accordu dà u s’accunsentu à l’impurtazione senza drittu di dugana per 38.000 tunnellate di carna picurina, 10.000 tunnellate di carna vaccina, 15.000 tunnellate di butiru, 25.000 tunnellate di late in pòlvera, d’un paese chì stà à più di 20.000 chilòmetri di l’Unione aurupea ! Ma pàrenu fole tamante à u mondu d’imbecillità induve no campemu !
Più di cinquanta urganisazioni di a sucetà civile frà e quale l’ONG francese ActionAid, Aitec, l’Amichi di a Terra, Attac, Bloom, a Cgt, a Cunfederazione Paisana, a Fsu, a Fundazione pè a Natura è l’Omu, Francia Natura è Ambiente (FNE), Generazioni Future, u Nostru Affare à Tutti, Veblen Institute, è u cullettivu naziunale Stop CETA/Mercorsur contr’à stu gèneru d’accordu ch’esiste trà l’Unione aurupeu, u Canadà è l’Amèrica Latina, anu lanciatu una chjama à e stituzioni aurupee da ch’elle ùn zìffranu st’accordu chì và à l’incontru di u sèmplice sumerinu. Una campagna citatina hè lanciata da ziffrà petizioni è mandà lèttere à i deputati aurupei. Ricùsanu di fà cresce cusì i scàmbii cumerciali cù decine di millaie di chilòmetri di distanza, fendu cresce à tempu l’emissioni di gasi à effettu di serra ch’impeghjurìscenu u ciambuttamentu climàticu, ridùcenu a biodiversità di a pianetta, impuverìscenu l’impiecu è e pupulazioni, fendu cresce l’inegualità suciale. L’accordu face nice d’impeserìscesi di u climà ma ghjè per fà passà megliu a decisione di sti scàmbii tonti scemi chì rispòndenu à un mudellu di pruduzzione è di cunsummazione ch’ellu ci tocca à finì per ùn strughje l’ambiente, u mondu, a vita. L’Agenzia aurupea di l’energìa dumanda di sminuisce duie volte più in fùria per raportu à l’ùltimi 10 anni, u scopu di 55 % di ridduzzione di l’emissioni di carbonu ch’ella s’hè data l’Unione aurupea da quì à u 2030. Ùn si pò prende risuluzioni d’un latu, è strùghjele d’un antru latu. E sfide per l’ambiente cummàndanu di cambià di versu e nostre pulìtiche, frà e quale a pulìtica cumerciale. L’accordu trà l’UE è a Nouvelle-Zélande cunduce à aumentà sti scàmbii, fendu cresce e spurtazioni di l’Auropa di 47 % !
Ci vole à sperà chì i deputati aurupei averanu u sumerinu d’ùn vutà st’accordu. •
