Comu si porta a scola ?
A scola seguita u so filu, t’avemu 12 scularii da i chjuchi chjuchi à i maiò per quist’annu qualchi zitelli sò scritti per l’annu chì vene, ma e scrizzione sò sempre aperte tandu ùn aghju micca u nùmaru precisu di zitelli per avà.
Comu l’insignamentu immersivu s’hè sviluppatu dapoi a lampera di l’associu ?
Ùn possu di male, chì tutti l’anni ci sò di più zitelli chì sò scritti, scole chì sò aperte, parsone furmate è riclutate tandu pensu ch’ellu si sviluppa piuttostu bè !
Comu vidite l’avvene di Scola Corsa ?
Perennu di sicuru. Cù a pussibilità d’accumpagnà i scularii da a scola materna à u liceu, hè u scopu.
Comu una ghjòvana maestra face a scelta di l’insignamentu immersivu è u mudellu assuciativu ?
Sò cunvinta chì l’immersivu hè u modu d’insignamentu ideale per a lingua, tuttu si face in corsu, l’insignamentu, u ripastu, a guarderia. I zitelli l’adòpranu di modu naturale. Cusì tenimu capu à issa sucietà chì ci rimanda sempre à u francese.
L’aspettu assuciativu hè assai assai interessante parchè chì hè à tempu a scola di i zitelli ma quella di i parenti dinù chì s’impègnanu assai. U fattu chì ci sia issa lea trà a scola, i zitelli è i parenti hè impurtente assai per l’avvene di i zitelli. •
