Frà i mumenti i più tremendi di a nostra stòria, ci hè « l’annu di a disgrazia ». Un fattu messu in cantu da u gruppu A Filetta, cum’una preghera. Sott’à a vindetta di u contu di Narbonne, a ripressione in Corsica hè atroce, sopratuttu in Niolu. U 21 di ghjugnu di u 1774, una sessantina di patriotti sò arrestati da u Generale Sionville, turturati, è ghjudicati di manera arbitraria. Dòdeci sò cundannati à a morte, è òndeci frà elli* impiccati u 23 di ghjugnu, è sposti in Corscia, Sidossi è l’Acquale, per spaventà a pupulazione. U più giòvanu, Marcu Maria, ùn avìa chè 15 anni. U dodecèsimu, Matteu Mattei ghjunghje à scappà. E salme di i curciarelli sò sposte cù l’interdizione à e famiglie di cacciale. I suldati francesi brùsgianu e so case, spòlsanu u so bestiame è perseguìtanu e famiglie. U Niolu hè in ruina. 52 altri patriotti sò mandati in e prigiò di Tulò da induve ùn si rivenìa micca. Ghjittati in ssi fossi prufondi senza usciu, cù acqua impuzzichita, topi è rimigna, si murìanu di fame o di malatìa. A ripressione hà da durà cusì da stirpà a rivolta. Ma senza ghjùnghjeci. E vittorie elletturale naziunaliste d’oghje si dèvenu misurà à i dulori di u nostru pòpulu. Ùn ci scurdemu di i sacrifizii di l’antichi. Simu debbitori.
Sè vo ghjunghjite in Niolu
Ci viderete un cunventu
Di u tempu u tagliolu
Ùn ci n’hà sguassatu pientu
Eranu una sessantina
Chjosi in pettu à u spaventu.
Dopu stati straziati
Da i boia o chì macellu
Parechji funu impiccati
Ci n’era unu zitellu
L’anu tuttu sfracillatu
È di rota è di cultellu.
Oghje chì hè oghje in Corscia
Fateci casu una cria
Si pate sempre l’angoscia
Intesu dì Marcu Maria
Era quessu lu so nome
Mancu quindeci anni avia. •
* Si chjamàvanu Cesaru Acquaviva, Remondu Acquaviva, Antone Albertini, Ghjuvanni Albertini, Ghjuvan’Stèfanu Albertini, Marcu Maria Albertini, Ignaziu Geronimi, Ghjiseppu Marìa Lucciani, Ignaziu Maestracci, Ghjuvan’Francescu Mattei, Anghjulu Romani.
