À l’occasione di a ghjurnata aurupea di e lingue, a Cullettività di Corsica, in parteneriatu cù a «Reta Canopé di Corsica » organizeghja e ghjurnate « Linguimondi », vènderi u 28 di settembre di u 2018 à u Palazzu Lantivy in Aiacciu.
À l’iniziativa di u Cunsigliu di l’Europa, dapoi u 2001, hè celebrata a ghjurnata eurupea di e lingue, ogni 26 di settembre. In i 47 stati eurupei di u Cunsigliu di l’Europa, l’820 milioni d’eurupei sò incuragiti à amparà di più lingue, à ogni età, tantu in scola chè fora di scola. Cunvinti chì a diversità linguìstica sia una via per migliurà a cumunicazione interculturale è unu di l’elementi principali di u patrimoniu culturale riccu di u Cuntinente eurupeu, u Cunsigliu di l’Europa sustene u plurilinguìsimu in l’Europa sana.
A Cullettività di Corsica s’hè assuciata à sta manifestazione eurupea è urganizeghja à Linguimondi dapoi u 2011. Hè stata mentre e so sette edizione scorse un attore di a pretesa di a lingua per avvià si versu u bislinguìsimu è u plurilinguìsimu è permette cusì à u corsu di spannà si in direzzione di u grande pùblicu per via d’animazione diverse è numerose.
L’edizione 2018 serà dedicata à a pruduzzione pedagògica à prò di a lingua corsa, pruduzzione chì cuncerna à tempu l’edizione d’òpere pedagògiche cum’è a furmazione di i maiò ; piglierà a forma d’un seminariu, u 28 di settembre è a reta Canopé di Corsica serà u partenariu di a Cullettività in a so realisazione.
A Cullettività di Corsica perseguiteghja a so cullaborazione cù u Canopé di Corsica, stabilimentu pùblicu naziunale chì ripresenta, dapoi parechji anni, per via di e so missione, un arnese è un centru di risorse à u serviziu di a cumunità isulana.
Sò duie e missione di Canopé chì ci pàrenu assai impurtante :
– u sèguitu di l’insignanti in e so pràtiche pedagògiche in u duminiu di a lingua è di a cultura corsa per via di a pruduzzione d’arnesi pedagògichi.
– a valurizazione di u patrimoniu isulanu à traversu à e numerose pruduzzione realizate. Cuscente di l’imbusche di a pruduzzione pedagògica è di a impurtanza d’un partenariu tal’è Canopé, a Cullettività hà decisu d’accresce a so dutazione anninca di 25 % à prò di st’organìsimu.
Seranu accolti intervenenti steriori chì feranu scumparte e so capacità di spertizia è u so ritornu di sperienza. S’agisce di trè riprisentanti di u Cap’Oc (centru d’animazione Pedagògicu in Occittanu) di Pau chì face parte integrante di a reta Canopé di Nova Aquitania è di a direttrice incaricata di a pedagogia in senu à l’organìsimu di furmazione in lingua brittona STUMDI.
U prugramma nant’à u situ :
www.isula.corsica/linguacorsa/Linguimondiedizione- 2018_a238.html
