In piena settimana induve s’hè parlatu assai di a màffia in Corsica, ramentemu ciò ch’ella hè l’offerta del padrino.
In u mondu di u crìmine urganizatu, omu chjama cusì ciò chè vo pacate per avè a prutezzione d’un maffiosu. Si parla dinù di pizzo, à l’iniziu era cum’è un assicuranza chì s’hè pianamente pervertita… A spressione ricolla à u principiu di u XXu sèculu quandu a màffia taliana s’hè sparsa à i Stati Uniti. L’imprese èranu prutette contr’à l’arrubecci, u vandalìsimu, è ancu contr’à e cuncurrenze… U grande pùblicu cunnosce sse pràtiche in grazia à u sinemà chì tratta di e màffie in Italia o in Amèrica, ma esiste in a vita vera ! S’ellu avìa avutu un pocu di più tempu, Leoluca Orlando, anzianu merre di Palerma invitatu à parlà di a so sperienza per luttà contr’à a màffia davant’à l’eletti di l’Assemblea di Corsica stu 27 di ferraghju, averìa di sicuru parlatu di ssa perversione in più in e pràtiche maffiose. Cù st’offerta del padrino, i maffiosi utilizèghjanu a paura è a minaccia per piglià soldi à l’imprese. Pacàteci è sarete prutetti da tutti i danni ! Vale à dì quelli di l’altri, ma dinù (è forse più sicuramente) di quellu chì ne face a pruposta ! Ancu u FLNC si n’hè ghjuvatu, chjamèndulu l’impòsitu rivuluziunariu o à l’usu francese, u racket. Più chè a viulenza stessa, ste pràtiche anu spiccati prufundamente i naziunalisti corsi è pè u più l’autunumisti è l’indipendentisti cù u so « a fine ghjustificheghja i mezi ». U racket hà cunduttu dinù l’indipendentisti à l’affruntamentu fraticìdiu ind’è l’annate 90. Si dispùtavanu i soldi… Risultatu : decine di morti è tamanti disguasti…
L’offerta del padrino principia aliscendu a vìttima, diciènduli ch’ella serà tranquilla, ch’omu s’occupa di tuttu, tuttu fendu sente sottuvoce chì scelta ùn ne hà micca. È s’ella ùn accetta micca quantunque, u maffiosu s’inzerga, minaccia, manda qualchi avertimentu, pò fà qualchi attentatu, è ancu viulenze fìsiche s’ellu ci hè bisognu, nant’à a vìttima o nant’à i soi. È più si paca, più omu hè vulnerèvule, è imprigiunatu ind’è sta gattiva rilazione. Di manera generale, l’affare finisce male.
I soldi di l’offerta del padrino o di u pizzo èranu (sò) invistiti dopu ind’è l’attività maffiose, i casinò, a prustituzione, l’alcool, a droga, i tràffichi da tutte e mamme… L’imprese chì pacàvanu (pàcanu) avìanu (anu) ancu accessu à certi servizii, entrate facilitate in i casinò è e buatte di notte, eccètera… Face chì in più di a « prutezzione », si stalla una spècia di servitùtine, è ancu d’arrulamentu.
À mè, u scàmbiu scemu di u 28 di ferraghju scorsu trà Trump-Vance è ssu corciu Zelensky mi face pensà à què. Trè anni ch’elli ricèvanu in capu bombe l’Ucràiniani, 80.000 morti, 400.000 feriti, millioni di spiazzati, 20.000 zitelli arrubati, un paese struttu, un paese agressatu, à u quale omu vene à fà l’offerta del padrino, diciendu : « pacate chì m’occupu di tuttu ! »
L’aiutu ch’hè statu fattu à l’Ucràinia, ùn era una dèbbita. Era una suvvenzione da ch’elli pòssinu bàttesi. Hè stata spiecata cusì tandu. A metà omancu di ss’aiutu sò soldi investiti in Amèrica, per pruduce l’arme nicessarie, per accoglie i rifugiati, pacà è urganizà l’aiutu umanitariu, per arrulà furmatori, ecc. Vale à dì chì sti soldi anu fattu dinù marchjà l’ecunumìa amèricana, aurupea, è quella di l’altri paesi sustenitori. Fà i conti avà, mette a cultella nant’à a cannella à l’ucràiniani, allora chì a guerra ùn hè còmpia, chì u paese hè da ricustruisce, è rileva di pràtiche maffiose mullizzose. Vergogna ! •
