Ci averemu da sorte un ghjornu cù u lozzu ? Sàbatu scorsu torna 150 personi omancu si sò adunite in Prunelli di Fium’Orbu per dì innò à l’aumentu di e tunnellate di lozzi da sutterrà in u centru di sutterramentu. L’inchiesta pùblica per ingrandà u centru si compie u 29 di ghjugnu. Tutti l’eletti di u paese, maghjurità è uppusizione, sò opposte à l’ingrandamentu annunziatu per 15 anni torna, è 665.000 tunnellate di lozzi cù càntere più grande « è un rìsicu di puzza aumentatu » dìcenu l’eletti. « U locu d’impiantu hè classificatu spaziu stratègicu agrìculu, e risorze in acqua ùn bàstanu, è simu in zona rossa di u pianu di lotta contr’à l’inundazione » rammèntanu torna. « A scelta selettiva ùn marchja micca… si sà dapoi quìndeci anni chì ghjunghjemu à sta scadenza in 2023. Avà ci simu, cosa hè statu fattu ?… Risichemu una decisione fatale è averemu bisognu di voi tutti per dà di pettu à stu flagellu ch’ùn hà duratu chè troppu. » Si capisce. Sò in zerga l’eletti di Prunelli chì sò stati da parechji anni sulidarii di a Corsica è si làgnanu d’ùn avè a stessa sulidarità in ritornu. Ùn vòlenu esse u rumenzulaghju di a Corsica è li pare èssesi sacrificati à nome di l’interessu cullettivu ! L’acqua di u Fium’Orbu hè impuzzichita, spazii agrìculi sò cunfiscati, l’abitanti subìscenu u scumodu, a strada chì cunduce à u centru ùn pò riceve camiò di più di 3 tunnellate è mezu, eppuru sò camiò belli più grossi chì pàssanu, a legge ùn hè micca rispettata è nimu (frà e stituzioni) ne parla ! U paese di u Prunelli di Fium’Orbu hè dunque prontu à mubilizassi torna.
Ogni corsu pruduce 721 chilò di lozzi à l’annu, sìa 243.933 tunnellate in 2021. 38 % sò spiccati, sìa 276 chilò à l’abitante : 93.746 tunnellate spiccate ! Ma 62 % di i i nostri lozzi sò sempre sutterrati. A pupulazione corsa aumenta assai dapoi u 2017, è pesa u turìsimu… S’hè pruduttu 8 % di più lozzi chè in 2020. A scelta selettiva hà aumentata anch’ella, ma ùn si risente micca abbastanza per vìa di l’aumentu di a pupulazione. Ci vole à dì dinù chì si pruduce 36 % di più lozzi à l’abitante chè nant’à u Cuntinente (526 chilò à l’annu ogni abitante). Sicuramente per vìa di u turìsimu ma dinù di i trasporti di marcanzìa chì prudùcenu assai pacchittumi di plàstichi o cartoni. Dapoi u 2017 a culletta selettiva ùn face chè cresce, pè u vetru, a carta, l’imballasgi, o i bio lozzi (spuchju di pomi ecc. chì fàcenu suvaccera). I bio lozzi solu aumèntanu di 38 % è 27 % di i Corsi anu una suluzione di suvaccera per pudè sceglie i so bio lozzi.
I lozzi spiccati in e ricicularìe anu aumentatu anch’elli di 2 %. E statìstiche dunque sò piuttostu bone, ma ci tocca à fà di più da pudè ingullà ss’aumentu di pupulazione. Sè tutte e cumunità di cumune fecìanu u stessu sforzu chì quelle ch’anu principiatu (Lìsula Balagna per un dettu) forse ùn averìamu micca bisognu di prulungà i centri di sutteramenti attuali. Sse statìstiche bàstanu à capì ch’ellu ùn ferma chè una suluzione sola : cuntinuate à spiccà i nostri lozzi di più in più. •
