Hè esciutu u 3 di nuvembre l’ùltimu EP di Michè Dominici « Trà bughju è chjarore », dispunìbule à l’ascolta cuntìnua illimitata nant’à l’appiecazione gràtisi di Bandcamp (da caricà à u furmatu mp3, Flac, ecc.).
L’EP hè trà u single è l’album, è questu quì conta sette canti fidi à a persunalità è l’indiatura ch’ellu ci hà rigalatu sinamente à oghje ss’artistu talentuosu di a Parata d’Orezza.
Trà creazioni nustrale è worldmusic, annanatu ch’ellu hè statu à a mùsica è à u cantu corsu, Michè s’hè custruitu u so pròpiu stilu. Piattu, prutettu, viculatu in u so paesolu d’Orezza, entre in e beatitùtine prupizie à a creazione quand’ellu hè quassù, trà i so muri, in ssa pìccula stanza induv’ellu ghjunghje quantunque à scansà quantità fenumenale di strumenti. È cumpone, aiutèntusi sìa cù a so ghitarra, sìa cù e so percussioni, sìa cù u sintè… sussureghja, è si lascia purtà da a musa chì l’ispira. Michè hè un artistu atipicu cù a so manera à ellu d’ammaestrà cusì bella voce, per cuntà i so turmenti di manera appaciata. A so rivolta, a scatineghja quand’ellu tene e so bachette chì currègenu i tamburi, pichjendu di core è d’ànima, tuttu ciò ch’ellu vole sprime. Hà sceltu di cantà trà e trè lingue di a so identità musicale, da u corsu à l’inglese è u francese. Una manera di cuntà ciò ch’ella hè a so vita d’artistu, da i so viaghji cù u gruppu Four Kicks, nant’à e scene d’Auropa, à l’accumpagnamenti è e cumpunizioni di parechji gruppi isulani, I Messageri, Diana Salicetti, Nicolas Torracinta, Doria Ousset, Voce Ventu, Barbara Furtuna, Vitalba, Francine Massiani è ne manca di sicuru… chì tuttu ssu mondu hè soiu ! A storia di Michè ghjè a spartera, cù mondu musicanti è cantarini quì, culandi, sparte è sparghje, sempre generosu è fraternu.
Eppò s’hè messu à cantà anch’ellu ! U decliccu, hè statu una surpresa purtata da a Covid. Da ùn affundassi micca ind’è u foscu di ss’èpica scema, si n’hè cullatu in u paese di mammone è babbone, à a Parata d’Orezza, à A Valella, u s’aggrottu ch’hè ghjuntu ellu stessu una bellìssima canzona (scritta da Amatu Leoni) ch’ellu canta cù u so cucinu, Rumanu Dominici. È cusì, culandi à A Valella, Michè s’hè messu à scrive è à cumpone, per ellu sta volta. Creatività nè hà da rivende l’amicu Dominici ! Dopu à a Covid, A Valella hè firmata u so studio di creazione è d’arregistramentu, induv’ellu hà inventatu un novu cuncettu, u live 360, spartu cù d’altri musicanti è artisti, u pruduttu di ssi scàmbii hè messu nant’à i retali, chì a so mùsica hè fatta per viaghjà è sparghje l’emuzione. È cusì hè nata ssa voglia di sparte torna cù tutti l’amichi artisti, è l’amichi paisani, urganizendu cuncerti istatini à a Parata. Emuzione.
Michè, u generosu, s’impegna tutti l’anni, da cumprà è distribuisce rigali di natali à i zitelli di famiglie senza soldu. È ghjè sempre cù a stessa generosità ch’ellu sparghje u so piacè di cantà cù a squadra di SpartiMusica, l’associu bastiacciu stallatu trà a piazza di u mercà di Bastia è u so Vechju Portu, induv’ellu s’impara a mùsica è u cantu in un cumbugliu culturale festivu di scàmbiu è d’allegrìa ! Generosità sempre, cù u s’impegnu per Scola Corsa, a scola d’imparera immersivu in lingua corsa. Michè hà scrittu è cumpostu un innu à prò di ssu magnìficu prugettu di salvezza di a nostra lingua. U canta cù parechji artisti corsi. Un àuru hè rigalatu à Scola Corsa ogni volta ch’ellu hè caricatu l’EP !
Eccu, Trà Bughju è chjarore hè un pocu tuttu ssu spìritu quì, tutta sta stòria ch’ellu simbulizeghja Michè Dominci. « Arregistratu in autopruduzzione, trà a mo càmera è SpartiMusica, hè un prugettu di core, fattu di voce, di leami è di ràdiche » spieca Michè. Emuzione torna, frà e sette canzone, ci hè « Amour en fête » ch’ellu canta cù a so figliola, Lia, 8 anni… l’amore, hè quessa a musa di Michè Dominici, chì u porta in ogni creazione. •
Per carcà l’EP : https://mich5.bandcamp.com/album/tr-bughju-chjarore
