Ssu 14 di ferraghju, un gruppu d’esperti di l’ONU hà dinunziatu i tràmpali messi à manifestà in Francia. Ssu gruppu face parte di un dipartimentu incaricatu di i diritti di l’omu à l’ONU ch’esamineghja e situazioni in u mondu.
A crisa di i curpetti gialli è mondu malfatti custatati dapoi sò analisati in un raportu. Pàrlanu di « l’utilisazione eccessiva di a forza » da i pulizzeri.
Dinunzianu dinù « u nùmaru impurtante d’interpellazioni è di guardie custoghje, di frugnichime, di cunfiscazione di materiale di i manifestanti, di ferite grave cù l’utilisazione sprupurziunata d’arme micca murtale cum’è e granate è i tiri di palle di difesa o di flashballs ».
S’inchiètanu è tèmanu chì ssa « risposta sprupurziunata » à a viulenza di i manifestanti cerca à « impedisce a pupulazione di cuntinuà à esercità e so libertà fundamentale ». Più di trè mesi di manifestazioni, più di 2000 feriti, frà i quali feriti gravi cume a pèrdita d’un ochju o d’una manu, ghjente struppiati, bastunati, gasati ancu s’elli ùn avìanu fattu nunda… o vìttime colaterale cume i ghjurnalisti. «Hè assai inchietante di custatà dopu à settimane di manifestazioni, chì e restrizzioni è e manere di rege ss’accolte cum’è u ricorsu à a forza ùn si sò micca migliurati ». Dice torna l’ONU, per raportu à a legge « anti-sciappadori », « a pruposta d’interdizzione amministrativa di manifestà, e misure di cuntrollu supplementarie è di sanzioni forte custituìscenu restrizzioni dure contr’à a libertà di manifestà.
Sse dispusizioni ponu esse appiecate di manera arbitraria è purtà derive gravìssime ».
Avete capitu chì l’ONU parla di u cusì dettu « paese di i diritti di l’omu » ! A Francia hè inditata cù sse derive pulizzere è tandu a so parulla s’addebbulisce à l’internaziunale. Omu puderebbe aghjustà à tutti sti rimpròveri, a disinfurmazione, e bugìe o a manera vergugnosa torna d’imbulighjà i manifestanti cù i veri sciappadori per imbruttisce i curpetti gialli in generale è discredità u so muvimentu…
Per l’esperti di l’ONU, a Francia ùn hè più cunforma cù u Pattu Internaziunale di i dritti civili è pulìtichi ch’ella hà zifratu. È li tocca in furia à cambià di versu. « Incuragimu a Francia à ripensà e so pulìtiche di mantenimentu di l’òrdine, è à apre e vìe di u diàlogu da fà calà a tensione è ricunnosce u rolu impurtante è legìttimu di i muvimenti suciali nu a guvernanza ».
Pensate chì u guvernu Macron-Philippe serà attenti à sse dumande ? O vai !
Fabiana Giovannini.
