U Cullettivu Parlemu Corsu hà lampatu una chjama à manifestà u 23 di marzu à 3 ore dopu meziornu, da ch’ellu sia ubligatoriu l’insignamentu di a lingua corsa.
A chjama di Parlemu Corsu hè stata sùbitu ripresa da i sindicati studientini, l’associi pè a difesa di a nostra lingua, è uni pochi d’altri urganìsimi da tutte e mamme, associi spurtivi o umanitarii, gruppi è artisti canterini, ben intesa, senza scurdassi di i partiti naziunalisti. Infine chì, u mondu culturale, è u mondu pulìticu si ritròvanu. Ma a chjama và aldilà di a famiglia naziunalista.
«U me sustegnu l’aveti è l’avareti sempri, pà u vosciu impegnu cuntinivu à prò d’issa lingua, pà u vosciu travaddu sinceru » dice Ceccè Lanfranchi per sustene u Cullettivu Parlemu Corsu. «Tenimu à sprima u nostru sustegnu à u Cullettivu Parlemu Corsu per l’inseme di e so azzione à prò di a nostra lingua. Simu cun voi » face sapè a squadra Dansa Futsal. Eppò, tant’altri messagii à buleghja, l’Orsi Ribelli, Canta 73, l’Associu Sulidarità, Induvinella, Scola in Festa, I Chjachjaroni, A Santamariaccia, l’associu Ramèntati d’Aucciani, i Socios di u GFCA, U Sporting Club di Bastia, l’associu Pà u Ricordu di Circinellu, A Sfida Canavaghjinca, I Baroni, Sorru in Mùsica, A scola di Cantu di Natale Luciani, u SALC, Studii Corsi, Soffiu di Lingua, Scrive in Corsu, I Liceani, a Cunsulta di a Ghjunventù Corsa, a Ghjuventù Indipendentista, Ghjuventù Paolina, L’Arghja, In Piazza, Ghjuventù Tavaninca, a Primavera, I Diàvuli, A Sbucciata, Tenda VTT Natura, Scopre, Ski Club d’Ascu, U Polpu, U Pinziglione, U Marinu, Via Corsica, l’Amicale des Corses de Draguignan, Les Amis de Cyrnea, Unione Corsa Antibes, Ghjuventù Centru drittu, Custruimu l’avvene, Ghjuventù naziunalista, Praticalingua, Pescadori in Festa, L’Arcusgi, Avà Basta, Associu Chjam’è rispondi, L’Eredi, I Chjami Aghjalesi, l’Attrachju, Contraversu, Centru di Corsica, Ghjuventà Cavaliera, Filu d’Amparera, Fiura Mossa, Associu A Vinzulasca, Fiere di Corsica, u Cumitatu Lisulanu, Festanima, Avà Create, Corsica Sida, Generazione Carlu Rocchi, Confrérie Fiadone, associu Spurtivu A Paolina, Immersione, Carbuccia Culturelle, Associu di lotta contr’à u focu, Anderemu, A Punta di l’Ortu, l’AILCC, Ascola di Zia Peppa, eccèttera, eccèttera… Mumenti cusì ci mòstranu quant’ella hè varia è dinàmica a vita assuciativa in Corsica. È quant’ella hè tenuta caru a nostra lingua.
Voi dinù, ùn ci mancate, mubilizàtevi è mubilizate a ghjente intornu à voi. Truvèmuci tutti sàbatu u 23 di marzu, davanti à a prefettura d’Aiacciu, à partesi di 3 ore dopu meziornu.
U scopu : da a scola materna à l’Università, a generalisazione di l’insignamentu di a lingua, l’integrazione in u zòcculu cumunu di a riforma di i licei, a cuntinuità di e filiere bislìngue, a furmazione di i prufessori, l’abilitazione di l’insignanti cù a sèguita di l’abilitati da sustèneli in u so travagliu, un cuifficiente di pesu à u basciliè pè a lingua corsa, è u mantenimentu di l’ozzione lingua corsa ind’è l’altre accadèmie, a messa in piazza d’un cuncorsu ùnicu è bislinguu pà u primariu, una furmazione di tutti i persunali di e scole primàrie, u rinforzu di l’ispirimentazione immirsivi di u primariu per appruntà a generalisazione.
Da ch’ella campi a nostra lingua !!!
