Marìa Marìa, à pedi si ne vinìa da a lattarìa annantu à a strada di Munacìa.
Innò ùn è micca una canzunetta… s’ella era, ùn l’avarìamu datu nome « sturietta ». Ma sarìa stata ghjusta chì, finiscendu in ballu, u principiu di a stòria, ci mittìssimu à cantallu.
Cù a so tinella in capu, andendu u so caminu, Marìa, strada facendu, si muntava u chjucchinu :
– Diciossette litri di latte… è trè d’acqua ch’è aghjustu, mi face un bigliettu di mille ghjustu ghjustu…
Cù mille franchi, mi compru un purchettu, è u lentu sottu à i castagni di Zìu Mariettu. Più tardi, ne facciu salcicci è prisutti…
È i piattu… sinnò, d’istate ci pàssanu tutti… Ci sò pò quelli cucini di Tunisìa chì s’elli li sàltanu addossu, u tempu di vultà u capu, è si màgnanu ancu l’ossu.
I me salcicci ùn ci hè asgiu ad appiccali, chì s’elli i vèdenu, i si màgnanu ancu senza mastucalli !
Partuti ch’elli saranu st’abbramati, i me salcicci i vindaraghju à i marcati…
È guardate sì u me càlculu hè astutu : da quì à tandu, i prezzi avaranu crisciutu… Pà i prezzi di i salcicci cum’è quelli di i frumagli, tutu dipindarà s’elli crèscenu i funziunarii…
Tandu mi pudarìa cumprà un mantellu… ma sarìa megliu una vacca cù u so vitellu. Par falli pasce, i lentu pà issi stradoni in lu pianu, quelli di l’automòbili, ùn avaranu cà andà pianu.
Vindutu ch’è aghju vacca è vitellu, mi compru trenta capretti ind’è Zìu Battulellu. Qunand’è vacu à ballà, par fammi dui salti, tantu saraghju ricca, mittaraghju i tacchi alti…
O Marì… par purtà i tacchi alti… ci vole à esse abituata.
A prova chì, nulla cà di pinsacci, tù, sè cascata… È à chì t’hà vistu a gamba à l’aria avarà cunclusu chì Marìa di u saone ùn ne facìa tantu usu…
È quale sò state e to rèndite nette ? I trè litri d’acqua chì t’ùn ai pussutu mette.
Muralità
Par guardà i nìvuli quand’i vo marchjate,
E strade di Corsica sò ricummandate…
Tarrenu pitricosu o tarrenu troppu mollu,
Di tutte e manere, ci hè da truncassi u collu ! •
