Arritti avìa parlatu qualchi mese fà di a chjusuru di u delfinarium di Marinland, u scàndalu di ss’animali chjosi ind’un bascinu à girà in tòndulu… Dopu à annate di maltrattenza, a Francia hà decisu di chjode Marinland dapoi ghjennaghju scorsu è a lege di u 2021 ch’interdisce à ripruduzione è a cattività di i cetacei per fanne spetàculi cumerciali. Dapoi tandu ùn si sapìa chì fà di e duie orche è i 12 delfini sempre in u so bascinu. Sò muti dapoi mesi i gradini di Marinland, sò stati rinviati l’impiecati, è suluzioni pè i mammiferi ùn si n’hè truvatu, nè in Francia, nè in Auropa. Omu avìa in brama di piazzali in riserve fatte à postu, in Italia o in Grècia, ma ùn sò pronte à accoglie l’animali. Sea Shepherd France s’era mubilizatu per impedisce u so trasferimentu in Spagna o à u Giappone, ch’era una suluzione ipocrita per sbarrazzàssine mandènduli in un locu chì autorizeghja ciò ch’hè interdettu in Francia. Dapoi tandu dunque èramu in e discussioni da tutte e mamme trà u ministeru di a Transizione eculògica è l’associ di difesa di l’ambiente…
Eureka ! Di pettu à l’urgenza, a ministra Agnès Pannier-Runacher è l’imbasciadrice à l’ambiente, Barbara Pompili, anu annunziatu màrcuri u 3 di sittembre, avè truvatu una suluzione. I delfini puderanu esse accolti à u zoo di Beauval, u più grande di Francia. A ministra è l’imbasciadrice anu adunitu torna l’associ, è l’ONG, C’est Assez, One Voice, Sea Shepherd è Tilidum’s spirit cù u zoo de Beauval è un espertu di i mammiferi marini, membre di l’Associu francese di i parchi zoologichi. Anu fattu l’annunziu : un centru d’accolta è di prutezzione di i delfini serà creatu à u zoo di Beauval ! Puderà accoglie l’animali ghjunti da i delfinarium aurupei, chì sò parechji à chjode, micca solatimente in Francia. Beauval sarebbe u primu centru d’un retale aurupeu per accoglie ss’animali è risponde à i so bisogni è u so benestà, aspettendu di pudè creà veri santuarii in mare.
Sti centri puderanu mette in ballu dinù prugrammi scientìfichi da capisce megliu è prutege i mammiferi marini. Seranu aperti à u pùblicu chì puderà scopre l’animali di manera pedagògica è rispettosa di u so benestà.
U parcu di Beauval hè prontu à rilevà scumessa s’ellu ci sò i finanzamenti ben intesa (trà 20 è 25 millioni d’àuri). Beauval puderebbe accoglie una vintina di delfini, ma micca l’orche disgraziosamente. Hè un prugettu « pionnieru » hà dettu Rodolphe Delord, u direttore di Beauval, « u benestà animale hè a mo passione, vulemu creà un novu mudelu, qualcosa di sfarente per raportu à u passatu pè i delfini, basatu nant’à u benestà di l’animali, a ricerca scientìfica è a sensibilisazione di u pùblicu… Ssu centru sarebbe in lea cù prugrammi in mare, è puderà porghje ancu aiutu à delfini arrinati nant’à e sponde ».
A suluzione hè aurupea è raghjunghje i prugeti di santuarii marini d’Italia in Tarente è di Grècia in Lipsi chì fèrmanu a sola suluzione pussìbule per l’orche. Pè i delfini, sò già 65 ch’aspèttanu di truvà un locu d’accolta. Cù sta decisione a Francia si mette in pusizione di capifila in Auropa. Ma ùn hè ancu fatta… ci vole à custruisce avà u mudelu ecunòmicu di sti centri, assucià attori pùblichi è privati, vale à dì truvà i finanzamenti. I nostri delfini ùn anu ancu finitu di girà in tòndulu. Ma una suluzione piglia forma. Infine ! •
