S’hè spentu Michele Raffaelli à l’età d’89 anni. Era un artistu, pittore, musicante, scenografu. Omu di teatru è di creazione, Michele Raffaelli laca una stampa forte è una bella làscita à a cultura nustrale. Hà fattu rinasce a cètera pè a quale hà scrittu òpere musicale, hà scrittu per parechji cantarini corsi.
Michele Raffaelli hà creatu dinù òpere teatrale è sparsu a nostra cultura per sse Francie è in Auropa, arrichendu u so talente è u so sensu artìsticu à l’Operà di Parigi, di Roma, di Berlinu. Hà travagliatu torna pè u Festivale d’Avignon.
Arritti prisenta e so cundugleanze afflitte à i soi. A Corsica perde un omu impastatu di cultura viva. Ch’ellu riposi in pace.
