Un zitellu chì migra, ch’ellu sìa di quì o d’altrò, ferma un zitellu. Un zitellu chì soffre, ch’ellu sìa da n’importa chì locu, ferma un zitellu. Un zitellu, una donna, un omu disprezzatu è righjittatu, quale sìa u so paese d’urìgine, ferma un zitellu chì soffre, una donna, un omu ch’abbisogna d’aiutu. Piantemu cù ssu disprezzu è ss’eguìsimu induv’omu s’inventa una bona cuscenza per ghjustificà ciò ch’ùn si ghjustificheghja micca. Oghje, cristiani mòrenu annigati in Mediterràniu, o cutrati sott’à a neve franchendu l’Alpe.
Pur-ghjìmuli a manu. Fèmuci umani. A grande cumunità di l’omi ùn pò stà senza fà nunda. Hè insuppurtèvule di sapè ciucci è più maiò chì pìglianu u rìsicu di francà u mare per scapà à a guerra, u terrurìsimu o a miseria, senza pudè truvà l’agrottu ch’elli vènenu à circà ind’è noi. E stituzioni tràttanu a situazione di manera statìstica allora chì 741 millioni d’abitanti (512 pè a sola Unione Aurupea) càmpanu nant’à più di 10 millioni di chilòmetri quadrati, è ch’ellu ci hè abbastanza piazza è pane pè e qualchi centunaie di milla di disgraziati imbarcati nant’à ssi batellacci di furtuna.
Dapoi quasi duie settimane, u battellu umanitariu alimanu Sea Watch 3 aspetta à u largu di Lampedusa in Italia, da pudè accustà cù 43 migranti à bordu. L’Italia di Matteo Salvini hà legalizatu ssu mancu di sulidarità, minacciendu d’un amenda di 10.000 à 50.000 àuri u Sea Watch 3, à l’incontru di tutte e lege di u mare chì chjàmanu à sustene quellu chì n’abbisogna. Puru, u Presidente di a Repùblica taliana, Sergio Mattarella hà amentatu chì i « duveri di sulidarità, d’assistanza è d’accolta » fecìanu parte di i principii fundimentali di a Custituzione taliana… « Salutemu u curagiu di quelli ubligati di fughje.
Un mondu chì sceglie d’ùn accòglieli, d’ùn salvali, di chjode e porte à u stranieru, hè un mondu foscu è funestu» hà dettu Carlotta Sami, purtavoce di u Cummissariatu à i rifugiati di l’ONU per l’Auropa suttanaccia.
Di pettu à tamanta disgrazia, amentèmuci i più di 60 millioni d’Aurupeani ch’anu migratu per fughje a seconda guerra mundiale da u 1939 à u 1945, da a Francia, l’Allemagna, a Pologna, a Belgica, per andà à l’Este o à u Sud… 40.000 frà elli sò stati cusì stallati in i campi di rifugiati di Sirìa, Egitta, Palestina, dice u Time Magazine publichendu fottografìe di i migranti di quell’èpica chì s’assumìglianu di manera tremenda à i migranti d’oghje, in i sguardi d’addisperu, i capi calati, i corpi faticati, e brame d’avvene. Un zitellu chì migra, ch’ellu sìa di quì o d’altrò, ch’ellu sìa d’eri, d’oghje o di dumane, hè un zitellu chì soffre.
Fabiana Giovannini.
