Babbu era militare… avemu dunque girandulatu per seguità e so affettazioni, è fecìamu i passi è veni istatina per ritruvà a nostr’ìsula cara. Èramu in bullore cù i mo fratelli, cuntenti cum’è pichji ! A Corsica era a libertà per noi zitelli, cullàvamu in paese, in u Poghju Mezana è da a matina à a sera ghjucàvamu ind’è a machja, per ssi castagni o sse nucèllule. L’altra parte di e vacanze, a passàvamu in Bastia ind’u mo caccaru parte di mamma, carrughju Sumerà. Quì dinù era libertà per raportu à u cuntinente. Babbu è mamma ci lasciàvanu in pace, sapìanu ch’ùn èramu troppu luntanu. Ghjucàvamu cù i zitelli di quelli elli ghjucàvanu quand’elli èranu chjuchi, per San Ruccucciu, San Ghjisè, o a piazza d’A’. È in matinata o in fin’di ghjurnata quand’u sole era menu altu, fallàvamu à u mare in Ficaghjola… Èranu i tempi beati di a zitellina induv’ellu si struttureghja a cuscenza.
È quand’ellu ci vulìa à ripiglià u battellu, chì crepacore ! Di vede alluntanassi e sponde care, ne pienghjìamu… Eppò un ghjornu avemu scupertu à a televisiò l’azzuffi di l’evenimenti d’Aleria… Hè statu cum’un ciambuttamentu ind’è a mo vita di zitelletta. Babbu ci’hà cuntatu tandu u scàndalu vignaghjolu, e rivendicazioni di ghjustizia, a stòria di Paoli ! Tuttu mi venìa chjaru d’un colpu : eccu perch’è ùn vulìa parte in fin’d’istatina ! Ùn era solu per vìa di vacanze chì si còmpienu… ci era una lea più putente chì mi ritenìa quì : eru corsa ! Tandu, aghju scupertu l’edea naziunale : pòpulu, terra, lingua, identità. Brama di ghjustizia, di dignità, di libertà. Vultendu in Corsica, campàvamu tandu d’un antra manera e fiere, e serate culturale, e frebbe pè i scontri di pallò, è ancu e ghjurnate d’Arritti quand’elle cascàvanu d’istatina… Èranu tempi duri pè u naziunalìsimu corsu… Ci era viulenza, ma ùn aghju mai intesu parulle di righjettu. U mo naziunalìsimu s’hè custruitu cusì in l’avviu patriottu ma sempre in u rispettu di l’altru, ch’ellu sìa francese o furesteru. Ùn aghju mai scuntratu un naziunalistu chì tenìa parulle d’odiu o di disprezzu. Osa è malvulè èranu in faccia. È u nostru, u naziunalìsimu, hè sempre statu di rispettu è d’accolta.
Hè cusì ch’aghju francatu u passu di l’adesioni.
Da ssa definizione «Corsu d’urìgine è Corsu d’adduzzione… cumunità di destinu »… Una lotta per difende a terra, riacquistà a nostra lingua, àpresi à u mondu, fà cresce u nostru pòpulu, cunvince ghjente, Corsi o nò, d’aduprà u stessu destinu, qualsìasi u so culore di pella. Eccu ciò ch’ellu hè u naziunalìsimu corsu : accoglie nant’à ssi valori d’umanìsimu è vultassi inseme versu l’avvene, per custruisce un paese drittu è degnu. Quelli chì si dìcenu naziunalisti oghje è ch’ùn anu chè velenu in bocca, sò ingannu è minaccia pè a nazione.
Fabiana Giovannini.
