SOS Méditerranée hè un associu civile aurupeu di salvamentu in mare. Hè statu creatu in 2015 per dà di pettu à a catastrofa umanitaria di millaie d’anneghi in Mediterràniu. U so scopu hè di porghje succorsu à i boatpeople è a so ghjente in perìculu in mare, cum’ellu a cummanda u drittu marìttimu internaziunale. Hè un associu umanitariu indipendente ch’ùn face pulìtica. Solu conta u rispettu di l’omu è di a so dignità, quale fussi a so naziunalità, a so urìgine, à a so appartenanza suciale, religiosa, pulìtica o ètnica. « Salvà a ghjente in perìeculu, cù uperazione di ricerca è di salvamentu. Prutege e personi succorse sin’à ch’elle sìanu prese in contu in un locu sicuru. Testimugnà dinù di a crisa umanitaria in Mediterràniu dendu a parulla à sta ghjentarella » cusì spieca l’associu i so scopi.
Custruitu in u 1986, Ocean Viking hè un bastimentu chì ghjuvava à l’indùstria petruliera in mare di u Nordu. SOS Méditerranée l’affretta dapoi u 2019 (nanzu avìa altri bastimenti). 69,3 metri di longu, 15,5 di largu, voga sott’à a bandera nurvegiana per porghje succorsu à i migranti in perdizione in u mare nostrum. Trè canotti di succorsu, un puntile per vede da luntanu, dui radari, una camerà infrarossu, un lucale medicale, dui altri lucali per traspurtà materiali è robba da manghjà, un aggrottu pè e donne è i zitelli, cù duscie è sanitarii, un antru per l’omi, una zona d’evacuazione urgente per riceve un eliccòtteru, una morga… eccu u mìnimu per esse uperaziunale di pettu à battelli sfurtunati persi in mare. L’avete capita, Ocean Viking hè una fiara in cor’di u Mediterràniu. Sò 11 marinari salvatori à bordu cù un(a) cuurdinatrice(tore) è a(u) so aghjunta(u). L’associu conta 120 impiecati di 17 naziunalità sfarente chì uperèghjanu secondu à e missioni. Ogni surtita in mare chede a presenza di duttori, infirmieri, mammane. Sin’à u 2021, l’associu l’impiecava. Dapoi, una cunvenzione cù a Federazione internaziunale di a Croce Rossa furnisce u persunale medicale è certi materiali, cum’è cuperte, prudutti d’igiena, medicamenti, aiutu psiculògicu… I disgraziati ricuperati nant’à e so imbarcazioni fruste, còntanu a so disgrazia, sempre di a stessa manera. Scappati da u so paese in guerra o affucatu da a misèria, anu abandunnatu tuttu daretu à elli, marchjatu ghjorni è ghjorni, attraversendu parechji paesi, à le volte ancu u desertu, patutu a fame, tenèndusi e so ecunumìe di parechje anni per pacà passadori, vale à dì scrucconi chì càmpanu di a so disgrazia è pìglianu tutti i so soldi per imbarcali nant’à battellacci tracarchi è sbrembati… Parechji attravèrsanu nanzu a Sirìa è còntanu u so martòriu ind’è « l’infarnu sirianu ». S’elli sò pigliati, sò imprigiunati, turturati, viulentati, è liberati solu sè a so famiglia pò pagà un riscattu. L’altri sò venduti cum’è schiavi. Franchèndusi tutte ste disgrazie, quand’elli sò succorsi da Ocean Vinking hè un bùffulu di speranza… l’Auropa li si pare un paradisu induv’elli bràmanu di custruìscesi u s’avvene…
Dapoi u 2016, 37.023 personi sò state salvate da SOS Méditerranée, di 34 naziunalità sfarente. Sei ciucci sò nati à bordu. 24 % di e personi salvate avìanu menu di 18 anni, frà i quali 79 % viaghjàvanu soli. 15 % èranu donne. 8 % èranu incinte è 58 zitelli di menu di 5 anni sò stati salvati in 2021. Stu pocu di personi saranu cusì un periculonu per l’Unione Aurupea di 350 millioni d’abitanti per ùn dà retta durante quasi un mese à stu bastimentu è à a ghjentarella ch’ellu traspurtava ? Vergugnosa indiferenza. •
