315 zitelli, maschji è fèmine trà 8 à 18 anni, è i so insignanti sò stati pigliati ind’una scola catòlica di u Nigeria, in u statu federale di u Niger, vènari scorsu. 303 zitelli è 12 insignanti, vale à dì quasi a metà di i 629 elevi di sta scola. I banditi anu attaccatu di notte trà un ora è trè ore di mane. U guardianu hè statu feritu. Pocu tempu dopu, una cinquantina di zitelli sò riesciuti à scappà. Ma l’altri ? Induve sò ? Cosa li fàcenu ?
U paese hè avvezzu di stu gèneru di kidnapping. Pocu tempu nanzu, 25 zitellette (tutte musulmane sta volta) èranu state pigliate in un liceu di Kebbi, u statu vicinu. Una hà pussutu scappà fendu crede ch’ella era maritata.
U lindumane torna, una trentina d’altri cristiani sò stati kidnappati in Eruku durante una messa in u statu di Kwara, sempre à u Nigeria. I banditi dumàndavanu 100 millioni di nairà, vale à dì 69.000 dòllari per ogni prigiuneru… Ancu assai ssi 38 ostagi sò stati liberati da l’armata
nigeriana.
Sò gruppi djiadisti ch’anu sparsu stu gèneru di rapimentu. Rìsichi ci n’hè pocu è micca di pigliàssine à zitelli, è a resistenza hè dèbbule parte di a pupulazione chì subisce. I parenti pàcanu u riscatu s’elli vòlenu rivede i so figlioli. Ci sò ogni annu, trà 3500 è 7500 kidnappings à u Nigeria, secondu à Crisis Group, un ONG fundata in u 1995 dopu à l’orori fatti in Somalìa, à u Rwandà è in Bosnìa. L’ONG s’impegna per privene e guerre è custruì un mondu di pace. È travagliu pò ci hè… In più di u business ch’elli procùranu sti kidnappings, sta crèscita di malfatte, secondu à u guvernu nigerianu vene da « l’annunziu d’intervenzione militare di i Stati Uniti contr’à i genocidii cristiani… Ste minaccie anu incuragitu certi gruppi armati à agisce per fassi sente nant’à a scena internaziunale ». In fatti, dice torna Crisis Group, ghjè « una manera di sfidà Washington ».
L’altra mutivazione di st’aumentu di rapimentu, secondu à l’ONG, hè chì « ssi gruppi cèrcanu à piglià zitelli per ghjòvesine cum’è scudi umani in casu d’intervenzione americana è impedisce l’attache aeriane contr’à elli ».
U Nigeria hè divisu trà un nordu musulmanu, è un sud cristianu. U paese hè dinù in guerra dapoi più di 16 anni è si còntanu 40.000 morti è più di dui millioni di spiazzati in u nordu di u paese.
A cumunità internaziunale hè stata cummossa da stu kidnapping ma per avà ùn si sà induv’elli sò sti zitelli è i so insignanti, è cum’elli sò trattati. « Lampu una chjama insistante pè a liberazione di l’ostagi » hà dettu Papa Leone XIV. « Risentu un dulore tamantu, pè i numarosi giòvani è e so famiglie ind’è l’angoscia… incuragiscu l’autorità cumpetente à prende decisioni apprupriate per guarantisce a so liberazione. Preghemu per ssi fratelli è surelle è per chì e ghjesgie è e scole fèrminu dapertuttu lochi di sicurezza è di speranza ».
Parechje scole sò state chjose per vìa di sti kidnappings, frà e quale 47 licei pùblichi. 10 anni fà, 300 zitelle d’un liceu à Chibok èranu state pigliate da i djiadisti di Boko Haram. Deci anni dopu, certe ùn sò mai state ritruvate. •
