A Corte Custituziunale vene di legalizà u Padduc di pettu à a Dumanda Priuritaria di Custituziunalità ch’ella avìa posta a cumuna di Coti Chjàvari. U Padduc, chì s’impone à tutti i documenti d’urbanìsimu di purtata inferiore, hè dunque sicurizatu pè a seconda volta, dopu à avè francatu u cuntrollu di legalità. Postu chì u Statu ùn avia micca ingaggiatu lagnanze di pettu à a Corte Custituziunale o u Tribunale Amministrativu. Hè dunque una bella vittoria demucràtica pè a Corsica ! Prima di tuttu per quelli ch’anu travagliatu à a so adduzzione. Frà quelli, a nostra magiurità ch’hà fattu tandu ciò ch’ellu ci vulia per cunvince è dà una dimensione pulìtica maiò à ssu documentu. Avemu circatu l’equillìbrii necessarii è prupostu l’urientazioni stratègiche da custruisce un veru sviluppu durèvule : priservazione di l’ambiente, lotta contr’à e truncature territuriale è suciale, ecunumia di pruduzzione, autunumia alimentaria è energetica, armeghju aurupeu è mediterraneanu, eccètera… Hè dinù una bella vittoria pè u nostru pòpulu, chì ssa decisione palesa a nostra capacità à truvà ss’equillìbrii è à decide di a nostre sorte. Pudè fà e so pròpie scelte pè u s’avvene, pè a nostra Assemblea, vene dunque d’esse accunsentitu da a Corte a più alta in Francia ! Hè un puntellu maiò per tutte e nostre brame. A Corsica vince in cumpetenza è in leghjittimità cù u Padduc è cun e scelte ch’ella face à ogni sessione di l’Assemblea.
L’urientazioni maiò di u Padduc sò messe in ballu di manera forte da a maghjurità dapoi un annu: accumpagnamentu di e cumune per l’elaburazione di i documenti d’urbanìsimu, scelte maiò per l’acconciu pùblicu ch’ellu ci vole à fà in cuncertazione cù e cullettività lucale, per indità «prugetti d’interessu magiori», pè u più in i settori d’inghjocu regiunali. Cuncertazione torna pè a messa in ballu d’una maestria di l’osservazione di i mercati fundarii è immubiliari, da pudè mette in òpera una vera strategìa di u fundariu è una pulìtica per l’alloghju. Lotta contr’à a precarità, stategìa di rilancia di a filiera di u legnu, strategìa di sviluppu di i nostri mezi di trasporti marìttimi è aerei, messa in ballu d’un pianu di sviluppu ecunòmicu è d’innuvazione in u senzu di u « riacquistu ecunòmicu » chè no bramemu pè a Corsica, messa in ballu di u pianu Muntagna, eccètera. Discutemu cù u Statu per tutti sti puntelli ch’abbisògnanu evuluzioni legislative è mezi dedicati. Sè u Padduc s’hè datu di fatti une poche d’urientazioni, a so messa in òpera chjama à misure cuncrete è finanziamentu ch’ellu ci tocca à truvà. Vale à dì, avemu une poche di battaglie torna à cunduce. Appuntamentu hè datu pè e pròssime vittorie!
Fabiana Giovannini.
