Hà dettu, Gilles Simeoni sta dumènica in Corti di pettu à 1500 personi, « simu più determinati chè mai, ci battimu per ssu paese, simu determinati pè a lotta, è simu determinati pè a pace. »
Femu hè a prima forza di l’ìsula è a vole fà sente à u guvernu è à a classa pulìtica clanista chì sbuciarda per fà paura à i Corsi. Dinunziendu u cumpurtamentu di u Statu chì si mette à fiancu à ss’arcaìsimi, è quellu di i puliticanti chì pròvanu à mette in ballu un « Fronte Republicanu» u capifila di Femu a Corsica hà ramentatu u scopu di u novu partitu…
«Ci hè a tentazione decisa per l’uni, piatta per d’altri, cusì detta incuragita da L’Elysée, di fà ciò chì si chjamava eri un « Fronte Republicanu»… tuttu contr’à i naziunalisti, tuttu fora di i naziunalisti… U nostru caminu à noi ùn hè micca i naziunalisti contr’à u restu di a sucietà corsa… Noi avemu un paese da fà. Noi vulemu custruisce ssu paese, cù tutti, è stu scopu pesa nant’à trè puntelli. Prima, u mèttodu. Quelle è quelli chì sceglieranu di raghjunghje à Femu a Corsica, quelle è quelli chì voteranu Pè a Corsica, vuteranu per cunvinzioni scritte, aduprate, pruposte à u nostru pòpulu in un accordu stragègicu chì ci ingaggia. Micca per un annu, micca pè a mandatura, ma nant’à i 10 anni à vene per cumincià à custruisce ssu paese… Naziunalisti iè, ma dinù apertura, sempre.
Demucrazìa, mèttodu è obbiettivu, a Corsica emancipata ùn pò esse chè una Corsica demucràtica.
Terzu puntellu, a trasparenza, a prubità, l’integrità… Simu nati d’un muvimentu ch’hà scumbattutu u clanìsimu, u clientelìsimu, i tràffichi d’influenza… Ùn pratendimu micca esse megliu chè l’altri, ma noi vulemu sorte di ssi sistemi è vulemu dacci i mezi per sòrtene, à traversu prucedure, à traversu scelte, à traversu mezi di funziunamentu…»
« E cose sò chjare » hà dettu torna Gilles Simeoni.
«Avemu un scopu stituziunale, quellu d’un autunumia di drittu è d’eserciziu pienu. Ottene in i trè anni à vene u trasferimentu à a Corsica di a cumpetenza legislativa in tutti i dumenii ch’ùn sò micca regaliani… pò dopu, avemu da mèttelu in ballu cù tutti i Corsi per custruise ssu paese, custruisce a nostra agricultura, a nostra ecunumia, parlà a nostra lingua cù un statutu di cuufficialità, furmà a nostra ghjuventù, àpresi nant’à u Mediterràniu. Un paese da fà, è l’avemu da fà inseme, tranquillamente, incù u nostru core, u nostru stintu, a nostra passione, u rispettu di i valori chì sò i nostri è chè vo avete cunsacratu ind’è a dichjarazione chè n’avemu vutatu »…
A strada hè aperta. L’arnese hè in piazza. Forza à noi tutti. Forza à l’avvene !
Fabiana Giovannini.
