Pasquale Castellani hè u figliolu di Michele Castellani, u deputatu cismuntincu di a prima circuscrizzione, nipote di Carlu Castellani, hà di chè tene ! Agente di l’Uffiziu Idròlicu di a Corsica di prufissione, hè statu elettu primu presidente di a Scola Corsa di Bastia. Cù u so fratellu, Marc’Andria, animatore di prima trinca di RCFM, anch’ellu sociu di u Cunsigliu d’Amministrazione di Scola Corsa, sò stati ciuttati in un bagnu di lingua è cultura corsa dapoi ch’elli sò nati ! Babbu di dui ciucci oghje, Clemente Maria, 3 anni è mezu, è Anna Aurelia, 2 anni, vole tramandà à u so tornu a so cursitùtine, fieru di pudè impegnassi ind’è cusì bella mossa cullettiva !
« Voliu ringrazià à i parenti d’elevi di Bastia d’avemmi designatu cum’è presidente di l’associu, ghjè un onore. Ci impegnemu tutti per cuncretizà ssu prugettu nant’à Bastia. Ringraziemu a cumuna di Bastia chì ci accumpagna. Hè un prugettu chì ghjè bellissimu per parechje ragiò. In primu locu si sà chì sò scole chì danu risultati boni, in tèrmine di bislinguìsimu, hè stata dimustrata chì i zitelli passati per iste filiere diventanu lucutori attivi di a lingua d’immersione. Si sà chi ammaestreranu benissimu a lingua francese dinù. I risultati di i zitelli di e scole immersive sò bunissimi ancu in francese e ind’è l’altre materie per raportu à e filiere nurmale. Ci hè dinù u fattu chè no simu accumpagnatu da a rete Eskolim chì ci porta a so sperienza di più di cinquant’anni. E prime scole ikastola si sò aperte in u 1969. Benefiziemu dunque di stu retale custì chì ci permette d’avanzà di manera sicura, di manera seria. Si tratta di l’avvene di i nostri figlioli, ci vole à purtà tutte e guaranzie di riescita in sse scularità. Ci hè infine a dimensione assuciativa chì ghjè assai pusitiva. A scola ghjè accumpagnata da i parenti d’elevi è tuttu u mondu s’impegna pè a riescita di u prugettu. Hè un’andatura chì face leia hè ghjè bè. seguitemu u prugettu pedagògicu cù e maestre, partecipemu à e scelte è simu impegnati à tutti i livelli di a vita sculare.
Stu prugettu ci mutiveghja assai tutti quanti. Si tratta di custruì e scole di i nostri zitelli, di tramandà a nostra lingua, d’avanzà, è si sente dinù, chì tuttu què risponde à un’attesa tamanta di a sucetà corsa. » •
