U prucessu di u duttore Le Sgouarnec hè l’orrore assuluta. S’hè apertu ssu 24 di ferraghju nant’à u so pindimentu, quasi cum’è sè u ghjuramentu d’Hippocrate ripigliava un pocu u sopra… astutezza di difesa o veru rimpientu ? Hà dettu Le Sgouarnec ch’ellu rigrettava. « Aghju cummessu atti odiosi… Capiscu è spartu a suffrenza… ùn possu rivene in daretu… Devu à tutte ste personi è à i soi d’assume a rispunsabilità di i mo atti è e cunsequenze ch’elli anu avutu è ch’elli averanu di sicuru tutta a so vita… »
299 vìttime da u 1989 à u 2014. Strutte. L’omu hà 75 anni, a so vita hè fatta ma quella di e so vìttime s’hè piantata à 2, 5, 10 anni… certi avìanu qualchi mese, màschju o fèmina, ùn anu pussutu veramente custruìscesi omu o donne, ch’elli sìanu cuscenti o nò di e so ferite prufonde. A mediana di l’età hè di 11 anni. « Brama di pudè migliurassi » dice unu di i so avucati… hà da esse diffìciule di pudè cunvince. L’omu ùn pare nè malatu nè ignurante. Era duttore, i parenti li lasciàvanu in tutta cunfidenza i so cinnini, è, palisendu i so fattoni, cunferma ch’ellu sapìa ciò ch’ellu fecìa…
5 mesi è 49 interrugatorii rivèlanu un stumacheghju. Hè ghjudicatu per avè viulentatu è cummessu viulenze sessuale nant’à omancu 299 zitelli durante 30 anni in 15 stabilimenti uspitalieri. Parechji altri sò scunnisciuti è d’altri torna sò prescritti. A perquisizione in casa hè stata tremenda pè i pullizzeri. Ci si tròvanu documenti d’un scunceghju senza nome, pupponi nudi, certi cù ghjòculi sessuali ligati nantu, fottò pedopornografiche, arrigistramenti, è più di 300.000 documenti d’una viulenza spaventosa. Fottò muntate di cinnini, è parechje prove chì testimugnèghjanu d’attività sadumasuciste, scatufile è zoofile cù i s o animali di cumpagnia. I pullizzeri tròvanu ciò ch’elli anu chjamatu « i carnetti neri » di u chirurgu genecològicu induv’ellu scrivìa e so sperienze nant’à i cinnini, cù l’intìtulu « e mo lèttere pedofile ». Tròvanu dinù schedarii infurmàtichi chjamati « piscinelli » è « vulvette »… induv’ellu cuntava e so prudezze… Ci hà riperturiatu i nomi di centinaie di pazienti ch’ellu seguitava. Nome, età, indirizzu, uspidale induv’ellu curava, e vìttime sò classificate è ci scrive ogni volta i sèntimi ch’ellu hà risintitu fendu i so crìmini. « Fumendu a mo sigaretta di a matina, aghju riflettutu à u fattu ch’eu sò un grande perversu. Sò à tempu esibiziunistu… badaghjinu, sadicu, masucistu, scatulogicu, feticcistu… pedofilu. È ne sò assai felice » si pò leghje nant’à i so carnetti… L’omu si dice « fieru » di ciò ch’ellu hè… I carnetti còntanu cum’ellu fecìa per ùn esse presu. S’arrangia per esse solu cù a vìttima addurmentata Parechje anu scupertu cù i pullizzeri ciò ch’elli anu campatu da chjuchi è anu capitu tandu u malesse di tutta a so vita… « Ci vole avè a pazienza » scrive torna l’omu spiechendu cum’ellu riperava a so preda. « Cù l’ochji d’una zitelletta si face cunfidenza à u so duttore » testimugneghja una vìttima.
Per parà tamante mullizzerìe, bisogna di più chè un stumacheghju dicèndusi « u tippu hè scemu ». Ci vole à cuntà a perversità di i pedocriminali da sveglià una presa di cuscenza cullettiva. Cundannatu in 2004 per avè cunsultatu siti pedupornografichi, Le Sgouarnec ùn hè micca inchietatu in a so prufessione puru sensìbule. Cuntinueghja à fà vìttime cum’è s’ella ùn era nunda…
Hè statu cundannatu à 15 anni di prigiò per avè viulentatu e so nipote è a so pìccula vicina di 6 anni in 2020. Hè cusì chì a ghjustizia hà scupertu l’altre vìttime… Quantu pedocriminali càmpanu a so vita tranquilli ? •
