I trè deputati naziunalisti corsi, Michè Castellani, Ghjuvan’Felice Acquaviva è Paulu Andrìa Colombani, u quartu deputatu di a Corsica, Jean Jacques Ferrara, i dui senatori, Joseph Castelli è Jean Jacques Panunzi, anu zifratu inseme ssu 15 d’ottobre 2019, in u scagnu di a Lega di i Diritti di l’Omu in Parigi, una dichjarazione cumuna chì dumanda l’avvicinamentu di Petru Alessandri è Alinu Ferrandi. Tremindui cundannati à a prigiò à vita l’11 di lugliu 2003, anu già passatu 20 anni in prigiò, cù a doppia pena, per elli è e so famiglie, di l’alluntanamentu.
U guvernu francese piglia pratesa di u statutu di DPS (prigiuneru particularmente signalatu) per ricusà ssu drittu à l’avvicinamentu. Ssu statutu l’impone un regime gattivu trà surveglianza cutidiana, cuntrolu di e so currispundenze è e so chjame telefòniche, cuntrollu è messa sottu sopra regulare di e so cèllule, schjarimentu di e cèllule di nuttata cù cuntrollu cù l’ochjellu, eccèttera… E famiglie dinù sò cuttighjate è inditate cum’è s’elle èranu culpèvule. È sò survegliati ancu l’altri prigiuneri in cuntattu cù elli. Dapoi 20 anni sott’à u ssu regime pèssimu, l’amministrazione penitenziara hè custrette d’addimette ch’elli anu avutu sempre un cumpurtamentu currettu è ch’elli ùn sò stati mai pigliati in difettu.
I diritti di l’omu, l’ingaghjamenti internaziunali presi da a Francia per rispittà ssi diritti, cummàndanu à accittà ss’avvicinamentu.
Hè un drittu. Avìanu tremindui 40 anni quand’elli sò stati arrestati.
Ne anu oghje 60. I parlementarii di Corsica sustènenu l’associu « L’Ora di u ritornu » è a Lega di i Diritti di l’Omu chì pònenu ssa dumanda. Ssa lèttera hè indirizzata à a ministra di a Ghjustizia. «Dumandemu chì Petru Alessandri è Alinu Ferrandi sìppianu sguassati da a lista di i DPS, cundizione necessaria da permette ss’avvicinamentu è una riinserzione familiale è suciale » dìcenu i parlementarii corsi. « S’agisce d’appiecà senza sclusione l’esecuzione sana sana di a lege per raportu à citatini uguali di pettu à ella, almenu ch’omu dimostra ch’elli ùn sò micca uguali, ciò ch’hè impussìbule ».
S’aspetta a risposta.
