Pigna, monographie d’un village de Balagna
Guidu Benigni a ci face sempre à surprèndeci : dopu à puema (Sfumatura, Puesie scelte…), dopu à libri pè i zitelli (Amadeu u Turcu…), dopu à rumanzi (Ieiettu…), dopu à traduzzioni (Le marcheur de l’oubli da Brancion…), dopu à nuvelle (À Cavallu…), dopu à stòrie mitològiche (Mitulugia…), cioè dopu à ùn sò quantu manere di sprìmesi, èccuci cù una munugrafia. Cosa hè una munugrafia? A parolla vene da u grecu μονός «solu» è γράφω «scrivu». Si tratta dunque, d’apress’à u Treccani d’un « Scritto di caràttere stòrico, letterario, scientìfico, che tratta un personaggio, un soggetto, un argomento determinato, di sòlito con criteri scientìfici ». Quì, u sughjettu hè dunque u paese di Pigna. Chì civoleàessedafàunbonu monografista? Prima di tuttu, ci vole à esse bibliofilu, l’amicu (φίλος) di i libri (βιβλίον) è frequantà e biblioteche, lochi induv’è si pone (τίθημι) i libri. Ci vole dinù à esse « storiofilu », l’amicu di l’inchieste (ἱστορία) ».
Cosa si trova in sta monografia? Prima, fotografie : « roba scritta cù a luce » (φῶς). Impreme assai l’etimologia « l’orìgine (αἰτία) di e parolle (λόγος) », ma dinù un glossariu : raccolta di vocàbuli d’una lingua (γλῶσσα), una bibliografia, àrburi genealògichi chì ci sò « menzione (λόγος) di l’orìgine (γένεσις) ». l’autore ammenta dinù l’onomàstica chì tratta di i nomi proprii (ὄνομα), a tupunumia chì spieca i nomi di i lochi (τόπος), a paleografia chì ghjè u studiu di e scritture anziane (παλαιός) », a filologia (amore di a duttrina, sopratuttu di l’erudizione stòrica). Di fatti, ci vole à studià tutte e fonte annant’à u sughjettu, è dunque cunnosce, per un dettu, a scrittura di u medievu.
Infine, averete capitu chì u scopu di issu artìculu hè spùticu: da esse un bon’munugrafista, ci vole à cunnosce… u grecu! Iè, quessu l’artìculu hè una chjama à a salvezza di sta lingua antica à l’orìgine di a nostra cultura europeana. V’aghju scrittu e parolle in grecu apposta: pigliate u santacroce (o alfabetu da ἄλφα è βήτα) grecu è pruvate à leghje isse parolle. Tandu sì chè vo sarete veri ellenisti. Aspittendu, leghjite puru l’òpara di Guidu Benigni chì rinvivisce unu di i più belli paesi corsi.
Marina Chovin
