Cosa averanu pensatu ssi Corsi di u diciottèsimu ? Chì stumacheghju,, chì angosce, chì còllera quand’elli anu amparatu u vergugnosu trattatu di Versailles chì i vendìanu per qualchi soldu ? Campàvanu tandu una revuluzione strasurdinaria à mezu à un mondu sottumessu à i puteri assuluti di i rè, in una Corsica liberata da Gènova chì smaravigliava l’Auropa di i lumi inventèndusi i primi passi di a demucrazìa, induve si parlava d’ugualità, di libertà, di sulidarità, d’ammaistrà un destinu cullettivu… L’èpica era intusiasmente è sfiatàvanu infine ssi Corsi di e muntagne è di e piaghje in una dinàmica di custruzzione chì i sbarrazzava di i disprezzi è l’inghjulie d’oppressioni chì li minàvanu da sèculi. Eppò hè ghjuntu ss’ingannu trattatu chì li prumettìa guerra è vultà in daretu… À l’avvicinanza di ss’8 di maghju, cum’è tutti l’anni, pensu à st’omi chì si sò lasciatu e so case, i so orti, e so famiglie, donne è zitelli pienghjenti, chjappendu solu u pilone, u fucile è a burraccia, per risponde à a chjama di u generale… Chì seranu stati l’ùltime parulle à a moglie, à a mamma, l’ùltimu sguardu à u paese ? Chì strappacore per ssa ghjuventù, per ssi babbi di famiglia, pronti à dassi in sacrifiziu pè a libertà di a nazione nascitoghja ? A maiò parte ùn èranu sullati, ma paisani, schjoppi è cannoni ùn avìanu mai intesu, è di truvassi di pettu à st’uniformi spampirulenti d’armatone falendu versu u ponte, chì li serà venutu in capu d’odiu è spaventu di fronte à tamanta inghjustizia ? Ci sò state qualchi vittoria malgratu e lotte inuguale, in Capicorsu, in u Nebbiu, in Casinca, in u Borgu… s’hè sparsa a speranza di cunclude un trattatu di pace priservendu l’indipendenza. Ma in fùria sò ghjunti d’altri sullati francesi, cù frambattura è cannoni torna, per còmpiesi a guerra in un sfracellu.
L’attaccu principia u 5 di maghju, Paoli si deve lascià u so quartieru generale in Muratu per cullàssine ver di u Curtinese. L’8 di maghju, a battaglia di Ponte Novu hè un scèmpiu. Golu corre rossu di sangue, càscanu à buzeffu i nostri paisani è s’ammànsanu e so salme… Chì serà statu a so ùltima pensata, u so ùltimu sguardu nant’à u ponte chì seppelliva e so brame d’avvene ? « L’arma principale di i Corsi era u so curagiu. Era cusì tamantu ssu curagiu chì durante una battaglia vicinu à un fiume chjamatu Golu, si fècenu un muru cù i so morti per lascià u tempu à i vivi di ricarcà… i feriti si mèssinu anch’elli frà e salme per rinfurzà u muru. In ogni locu si trova u valore, ma azzione cum’è quessa ùn si ne vede chè ind’è i pòpuli lìberi » testimugnava tandu u filòsofu Voltaire. A battaglia hè persa è cù ella l’indipendenza. E truppe francese ammaèstranu l’ìsula in qualchi settimana è Paoli hè custrettu à l’esiliu sperendu di pudè vultà più tardi. Imaginate tandu l’angosce, a sulitùdine è l’addisperu di ssi paisani… A vindetta serà tremenda à longu à 20 long’annate per circà di sottumette ssi Naziunali.
I libri di stòria còntanu i fatti ma ùn ponu micca dì u frastornu è u curdogliu d’un core umanu chì vede sfundassi tutte e so speranze. Arricurdassi cù rispettu di u sacrifiziu di l’antichi da ch’ella si tramandi a so brama di libertà, eccu l’8 di maghju. •
Fabiana Giovannini.
* Cum’è annu, per vìa di e cunsigne di sicurezza in lea à a Covid, a cummemurazione ùn pò esse pùblica. Ci sarà una messa è un umagiu à u fiume da l’associu u Ricordu di Ponte Novu à nome di tutti.
