L’8 di dicembre, ghjornu di l’Immacculata Cuncezzione, hè statu sceltu da l’antichi corsi per festighjà a Nazione. Dapoi, manifestazioni da tutte e mamme, mostre, cunferenze, serate si fàcenu in parechji paesi di l’ìsula.
L’associu Memoria di u Fium’Orbu hà tenutu cunferenza è unuratu quist’annu una placca cummemurativa in memoria di i pastori massacrati da Marbeuf in u 1774. Sciaccamanemu u travaglione di ss’associu pè u riacquistu di a nostra stòria !
In Conca, dopu à avè posta cum’è tutti l’anni a bandera maiò in muntagna, una grande serata invitava à fà festa cù u gruppu I Voci di a Gravona.
In Aiacciu, à a chjama di l’APC, militenti si sò aduniti in giru à a stàtua di Pasquale Paoli spustendu una placca cummemurativa in l’onore di Ghjaseppu è Bartulumeu Masseria, cascati in u 1763 pruvendu a piglià u castellu è a cità d’Aiacciu. Una messa nustrale hè stata detta dopu à a ghjesgia San Petru è San Pàulu.
Ringraziemu à tutti l’associ chì s’impègnanu per unurà l’8 di dicembre ! À quist’annu chì vene ! •
