270 zitelli feranu a so rientrata di sittembre 2026 in e scole assuciative d’insignamentu immersivu Scola Corsa. È ssa rientrata hè digià affucata pè a Federazione custretta di ritenesi per raportu à e so brame d’apre novi siti d’amparera. Oghje sò cinque, di sittembre sei, pudìanu esse di più, sette, ottu, deci… ma u Statu francese ùn riempie micca e so ubligazioni di dà i mezi ch’ellu ci vole à i parenti da chì i so zitelli àppiinu u drittu d’andà à scola cum’ella li pare !
Puru l’impone a lege à u Statu di porghje e risposte à ssa dumanda. U guvernu s’hè ingagiatu di pettu à a Federazione Scola Corsa, ma l’òndeci posti chersi per ssu 2026 ùn sò ancu cuntrattualizati tutti. È a Federazione deve rifrenassi nant’à a ricerca di novi siti sculari, novi parenti, novi lucali… Hè una frustrazione tamanta. L’inghjochi di a rientrata sò maiò per Scola Corsa.
A pedagogia, l’insignamentu prudùcenu già risultati magnìfichi è cunfèrmanu l’interessu maiò d’un insignamentu immersivu pè u sviluppu cugnitivu di u zitellu. Anna Catalina Santucci, a direttrice di sse scole, risponde à e quistioni d’Arritti nant’à ssu travaglione fattu da a Federazione è e so insignante. Tante sciaccamanate à tutti !
A rientrata pulìtica, l’avemu capita, serà dunque impurtantìssima quist’annu. Per via di Scola Corsa, e dumande fatte à u livellu di a Cullettività di Corsica, l’ingagiamenti presi da u Statu chì strascina sempre i pedi. Ma serà impurtantìssima dinù per via di l’inghjocu maiò di a lege custituziunale nant’à l’autunumia di a Corsica, solu veru arnese per sparghje a nostra lingua. U travagliu fattu da Femu a Corsica nant’à stu puntellu è e brame suciale di a Corsica, u scrutinu dinù di e Senaturiale di sittembre, postu chì u Senatu averà à dibàttene, anu da esse determinanti. Francescu Martinetti è Paulu Santu Parigi rispòndenu ancu elli à u nostru settimanale ind’è ssu nùmaru speciale d’Arritti cunsacratu à una rientrata faccendosa per tutti.
L’iniziativa presa da una cinquantina di specialisti di a quistione energètica è di militenti di a càusa di l’autunumia energètica di a Corsica, ferà dinù a rientrata. Cosa dice sta chjama ? Ùn pudemu cuntinuà cusì, a Corsica hà risposta à fà valè !, valori è richezze tamante in tèrmine d’energie rinuvelèvule chì sò a chjave di a nostra autunumia energètica. A nostra ìsula pò esse un veru laburatoriu pè u mondu d’edee è di pràtiche da sviluppà. Sìate attenti à sta dimarchja, hè l’avvene !
Ma l’inghjochi sò dapertuttu. A nostra agricultura ne cumporta assai è Arritti ne sparghje torna a riflessione. L’iniziativa di risturà un aghja in Vàllica, piantà granu, rifà e tribbiere antiche di a nostra civilisazioni agrosilvopasturale, indita anch’ella quantu a nostra agricultura cumporta inghjochi d’avvene. À ringrazià quelli chì s’impègnanu à sse sfide maiò !
È ssa giuventù cusì vuluntaria è fiera ! Cum’ella hè bella è quant’ella sparghje speranza per u nostru pòpulu ! Arritti li riserva una piazza ind’è ssu nùmaru speciale. Forza o giuventù chì l’avvene sì tù !
L’auturnu aprerà perspettive dinù pè a Federazione Regioni è Pòpuli Sulidarii ch’appronta a so università d’ottobre pròssimu, federalìsimu, cuuperazione aurupea, elezzione presidenziale, i temi sò impurtanti è àprenu perspettive maiò per tutte e regioni chì scumbàttenu à strappà di più autunumia è cumpetenze.
Infine chì ssu nùmaru speciale v’invita à riflette nant’à e pussibilità d’un ìsula chì n’hè piena è chì deve urganizassi per risponde à tutti i tràmpali ch’ellu ci vole à scumbatte.
Aspettendu, bon’mese d’aostu à tutti è bona rientrata di sittembre ! •
