Sàbatu chì vene, u 15 d’aprile ci serà in Parigi l’Assisi pupulari pè e libertà (sala Henaff, Borsa di u travagliu, 29, corsu du Temple, metrò Repùblica). U mottu di ssa chjama hè : Contr’à e viulenze di Statu, resistimu ! Una videò* spieca cù imàgine forte a còllera di parechji associi e persunalità aduniti ind’è ssa chjama. Ci si sente a voce di i più alti raprisententi di u Statu, Macron, Darmanin, Borne, u prefettu di pulizza Nuñez… ricusendu l’accuse di ripressione è stumachèndusi di e viulenze manifestante à tempu ch’ellu si mostra viulenze pulizzere cecche nant’à vechji o ghjòvani, omi o donne, batterchjate, carche pulizzere, scuzzulate è lacrimogene in pienu visu nant’à ghjurnalisti, testimugnanze d’abusi sessuali, feriti, minaccie è insulte…
« Basta, ùn ci lachemu più fà, appuntamentu à l’Assisi pè e nostre libertà contr’à e viulenze di Statu » dice torna sta chjama, « Resistimi oghje o mai, simu u rampale contr’à a ripressione ».
Zìffrenu sta chjama : Attac, a LDH, Coudes à Coudes, u Sindicatu di a Magistratura, a Fundazione Copernic, Les Soulèvements de la terre, Droit au Logement, Blast, La Coordination des Sans-Papiers, le Comité Adama, la Zad de Bure, l’Observatoire international des prisons, Extinction Rebellion Paris, Les Mutilé-es pour l’exemple, le Gisti, le Bloc Lorrain dissous, l’Association des travailleurs ma-ghrébins de France, la Quadrature du Net, La Marche des Solidarités, l’UNEF, Dernière Rénovation, Solidaires, la FSU, le Front Uni des Immigrations et des Quartiers Populaires, Pas Sans Nous, le Syndicat des Avocats de France, Assa Traoré, Rokhaya Diallo, Etienne Balibar, Jean-Baptiste Eyraud, Mame Fatou Niang, Eva Joly, Kevin Grillot, Monique Pinçon-Charlot, Denis Robert, Dominique Manotti, Jérôme Bourdieu, Mariame Sidibe, Patrick Baudouin, Eric Fassin, Bernard Lahire, Olivier Lecour Grandmaison, Youlie Yamamoto, Evelyne Sire-Marin, Nelly Bertrand, Loïc Schneider, Laurence de Cock, Fatima Benomar, Jérôme Rodrigues, Bertrand Mertz, Omar Slaouti, Vincent Brenghart, Anne-Sophie Simpere, Saïd Bouamama, Natachja Chetcuti-Osorovitch, Pierre Khalfa, Willy Pelletier… Ghjente da tutte mamme, sociologhi, filosofi, avucati, magistrati, artisti, pueti, scrivani, prufessori, circatori, pulìtichi, militenti contr’à u razzìsimu, ghjurnalisti, militenti assuciativi, sindicati, vìttime di viulenze o citatini rivultati da un cuntestu di ripressione di più in più viulente parte di a pulizza chì appieca sta ripressione subitu, di manera disprupurziunata è cusì si ne piglia à e libertà fundimentale cum’è u drittu di manifestà. Dapoi u muvimentu di i Gilets jaunes, sò nati dinù novi mezi repressivi cum’è e brigade motorizate, chì mènanu anch’elle di manera cecca è brutale. Cume dinù a tènica d’intrappulature induve a ghjente hè achjerchjata senza pudè scappà. Cume e granate splusive o i tiri tesi di palli di plàsticu chì fàcenu mondu disguastu nant’à a carne umana. Ci sò stati feriti gravi, ghjente ch’anu persu un ochju, una manu, è frà e vìttime si tròvanu manifestanti pacìfichi, ma dinù sèmplice spassighjatore, o ghjurnalisti. E manifestazioni contr’à e ritirate sò state torna un livellu in più ind’è sta ripressione cecca. È quella contr’à i grandi bacili in Sainte-Soline anu rivultatu assai. E Nazioni Unite, u Difensore di i Diritti, u Cunsigliu di l’Auropa è mondu capitale aurupee s’inchiètanu di l’usu eccessivu è sistemàticu di a forza ind’è e manifestazioni in Francia. Ste viulenze fàcenu nasce fratture impurtante ind’è a sucetà, cù forze di l’òrdine chì causèghjanu più disòrdine chè òrdine è cèrcanu à amutulisce a ghjente. Basta à a ripressione ! •
