Èranu più di 5.000 personi in Furiani pè u ritornu di u Sporting di pettu à u so pùblicu ssa dumènica ! È chì piacè ! Spècia di sìntimu di rivìncita… Dapoi u mese d’aprile scorsu, èramu privati di scontru, marturiati chè no èramu da a fallata di i Bastiacci di cinque piani. Una cascatoghja scema chì ci hà fattu male è ci hà lasciati pieni à ferite da curà. U core, tandu, ùn ci era per cantà cum’è in quelli tempi induve Furiani rughjìa cumu leone. Puru, mischiu di gioia di ritruvassi ind’u nidu di tante belle vittòrie, è di tristezza d’èssene ghjunti à quellu sfundamentu, i mughji ci èranu quantunque ! Eppò ssi ghjòvani turchini ci anu fattu pròpiu piacè ! Bastiacci cumbattivi di pettu à Casinchesi valurosi, anu vintu à francàssila d’un antru giru di a Cuppa di Francia. Puru a vittoria ùn hè quessa ! Ma piuttostu quella di pudè sempre corre nant’à ssu pratu d’Armand Cesari ! È da a Lega 1, fiura di u ghjocu à pallò francese, à a Naziunale 3, ci hè un mondu ! U ghjocu hè pienu, aspru è nerbosu, à le volte ancu gattivu… e gambe di i ghjucatori ùn vàlenu tantu per raportu à quelli di a Lega 1… i nostri vàlenu 2000 o 3000 auri, à u più à u mese… quandu d’altri còntanu 220 millioni d’àuri… u trasferimentu solu ! chjìbba, saetta !!! Quandu vi dicu ch’ellu ci hè un mondu di spiccanza trà l’uni è l’altri ! In quantu à l’arbitri làcanu fà, u « cuntattu » hè permessu, trìppa ! Eccu, hè cusì ! Bastia ùn vede più à Parigi, Lyon o Marseglia, si cunfronta cù Sartè, u Valincu o a Casinca in Coppa di Francia. Cù Aubagne, Endoume o Le Pontet in Campiunatu… u risultatu di u guastapiglia è di l’irrispunsabilità di certi… A sopravivenza di u Sporting hè frutta di a vuluntà scema di passiunati di u skeubeu. È simu uni pochi ! Capi d’impresa si sò aduniti per mette mondu soldi da a so stacca, da salvà u club. Sustenitori si sò aduniti anch’elli da partecipà à a rinàscita di a squadra turchina. È cusì, pudete vede per un dettu, sustenitori pulisce e sèddie di u stadiu, appruntèndusi pè u scontru ! Cusì torna, pudete vede u presidente di u club, tene a buttega à u mezutempu cù uni pochi di benevulenti per serve à beie à u pùblicu… po po pooooo ! È in grazia à tutti ssi passiunati, u Sporting ùn hè ancu mortu !
Ma bellu vivu! 2500 abbunati in duie settimane… 5000 socios… ùn si vede indocu! A stòria turchina hè fatta à culpacci è trafalate… eppuru, s’hè sempre addirizzatu u Sporting ! È torna, rinascerà ! Pudete fà parte di ssa nova scumessa ancu voi. Aiutate à tutti quelli chì si danu di rimenu : abbunàtevi !!!
Fabiana Giovannini.
