Ma d’induve vene ssa pulluzione radiuattiva à u Ruthenium 106 scupertu in Francia trà u 27 di sittembre è u 13 d’ottobre scorsu? À u mumentu di scrive ss’articulettu, ùn si sapìa. È s’ellu era stata scuperta trà sittembre è ottobre, u pùblicu, ellu, ùn l’hà sapiuta chè di nuvembre… Quale pò dì chì u nucleariu hè un energìa sicura !!! Pare chì e quantità in Francia sò puchìssime… puru ùn a vi dìcenu ch’avà ! È à cantu à u locu di l’accidente, seranu periculose assai !
Dice l’Istitutu francese di radiuprutezzione è di sicurezza nuclearia chì l’accidente puderebbe esse in Russia… Moscù ellu, dice di nò. In tutti casi u Ruthenium ùn esiste micca à u stadu naturale, vene d’un attività umana. A Cummissione di Ricerca è d’Infurmazione Indipendente nant’à a Radiuattività (Criirad) dice ella chì l’affare hè inchietante è scandalosu d’un sapè ancu, un mese dopu, da induve vene ssa pulluzione ! Dinunzia : « a Francia ùn hè stata in situazione d’alarma o d’alerta… ssu radiuelemente hè statu avvintatu ind’è l’aria di parechji paesi aurupei. Dumandemu chì tuttu sìa fattu da lucalizà u locu da induv’ella vene ssa radiuattività. » S’inchieta a Criirad di a pupulazione à l’ingiru di u locu di pulluzione chì deve esse putenta assai. Secondu à l’Irsn, s’agiscerebbe d’una pulluzione di 300.000 milliardi di becquerels, vale à dì quantità tremende !
« L’impattu pè e pupulazioni hè impurtante, ci vole à sapè in furia induve agisce » dice torna a Criirad. D’appressu à ssi scientìfichi indipendenti, a pulluzzione puderebbe vene di un usina di trattamentu in Russia. À livellu di l’imbasciate di i paese aurupee in Russia hè pussìbule di truvà d’induv’ellu vene ssu mulizzu. Basta à fà prelevamente d’arbe o di terra à l’ingiru di l’imbasciate, o cuntrullà l’aviò chì rivènenu di e zone suspettate. Ci sò centu mille manere di fà inchieste soprapiazza per esse sicuri d’induve vene ssa pulluzione. Dice torna a Criirad ch’ellu ci volerebbe à rinfurzà e capacità di misure in giru à e stallazioni nuclearie in i paesi induv’omu hà pocu infurmazione. Ci vole à sapè in furia u locu ch’hè statu toccu per parà i rìsichi di càncaru o di malatìe grave pè e còrcie pupulazione ch’ùn dèvenu sapè u perìculu ch’omu li face corre. Ùn pudè lucalizà u situ di pulluzione hè veradimente incredìbule, dice torna a Criirad.
Infine chì, cù l’indùstria di u nucleariu simu sempre à sicutera ! Mutaghjine, bucìe, ingannu.
