«Disgraziatu u mondu senza utopìa ! Spessu l’utopìe d’eri sò e realità d’oghje. » Cusì dicìa Dom Elder Camara, appòstulu di a no viulenza in Amèrica Latina. È cusì hà fattu Saint- Pierre-de-Frugie, paisolu sfurtunatu di a Dordogna francese. In 2008 si lagnàvanu i so abitanti di a disertificazione, l’esiliu di a so ghjuventù, è l’invichjamentu di a so pupulazione. Mancu 10 anni dopu, u paese s’hè rinvivitu, è a ghjente hè in fretta di truvacci una casa ! A sòsula di ssa rinàscita ? L’eculugìa ! Gilbert Chabaud hè statu elettu merre di Saint-Pierrede- Frugie in 2008. In 2007 avìa chjosu a scola, fendu morre l’ùltimu cumerciu di u paese, u caffè ch’appruntava tandu u manghjà pè i zitelli. U novu merre hà decisu di dà un andatura bio à u so paese. Hà interdettu i pesticidii è i trattamenti chìmichi, creatu un giardinu cundivisu di permacultura, apertu à tutti i paisani da ch’elli pòssinu truvacci frutti è legumi. Hà messu in ballu un animazione sulidaria in giru à quell’ortu eculògicu. L’affare s’hè sappiuta è hà allittatu ghjente à l’ingiru. L’elettu tourna hà sviluppatu un turìsimu per accumpagnà quellu cuncettu novu di spartera. «Migliurendu u nostru ambiente, cumprendu zone acquose in giru à u paese, ci simu detti ch’ellu ci era qualcosa da fà mettendu in ballu un ecoturìsimu » spieca Gilbert Chabaud. Cusì hà apertu è accunciatu chjassi di spassighjate, hà rinuvatu di manera eculògica cù materiali lucali u pìcculu patrimoniu di a cumuna, è cù un pocu di cummunicazione, i turisti sò vultati ! Hà custruitu un alloghju rurale è eculògicu per l’accolta di a ghjente, è riapertu, in 2013, u so caffè ! A dinàmica era nata. Pocu dopu s’hè apertu dinù una buttega bio per vende i prudutti di l’agricultori di a regione ! Tandu si sò stallati l’abitanti, parenti cù zitelli, è s’hè riaperta a scola ! È postu ch’aiutu ùn ci n’hè statu parte di l’Educazione Naziunale, u merre hà creatu una scola Montessori, vale à dì una scola partecipativa è sulidaria induve mèttenu manu in pasta i parenti è induv’ella s’appieca una padagogia di l’aiutu. Un annu dopu, ci èranu 20 zitelli in scola ! «Ùn si passa micca un ghjornu senza ch’eo ricevi un colpu di filu per sapè s’ellu si pò cumprà una casa in paese » dice a secretaria di a merrìa ! È ùn hè solu un effettu di moda. A pupulazione hè torna cresciuta di 80 parsoni dapoi u 2018. U merre vole apre avà un museu d’un gèneru speciale… parla d’un museu « à l’arringuersciu », invece di parlà di u passatu, parlerà di l’avvene ! A pròssima scumessa hè di fà di Saint-Pierre-de-Frugie un paese autònomu in energìa ! Eccu una bella stòria nant’à ciò ch’omu pò, quand’omu vole… è chì porta a prova chì l’eculugìa ùn appartene micca à u passatu. Bellu u cuntrariu, hè mudernità è innuvazione !
Fabiana Giovannini.
