Marignana è u so Sant’Antone Abbate sò à l’onore ! Hè sta cumuna ch’hà vintu u cuncorsu di u « Plus Grand Musée de France » cù più di 4000 voti in favore di a so òpera. Ci èranu trè prugetti in cumpetizione per sta campagna 2024-2025 : u Sant’Antone Abbatu di Marignana, a Vèrgine di u Rusariu di Rennu, è a Vèrgine è u zitellu in Biguglia. Un bellu sceccu di 8000 € hè statu rimessu stu 23 di maghju à u nostru amicu merre di Marignana, Matteu Ceccaldi.
Allianz France, impresa d’assicuranza generale fundata à u XVIIIu sèculu, hè un meceniu chì sustene cuncorsi cum’è quessu. Allianz France sustene dapoi u 2021 u più grande museu di Francia appughjatu à a Fundazione pè a Salvezza di l’Arte è u patrimoniu francese.
« Numarose sò l’òpere ch’anu bisognu d’esse risturate per assicurà a so cunservazione. Suvente sò pìccule cumune ch’anu pocu è micca mezi chì pròvanu à salvale. Senza bugettu, sò òpere cundannate » dice Allianz France. Stu cuncorsu annuale hè dunque più chè benvenutu. È ghjè statu u casu pè a cumuna di Marignana. « Hè stata un opportunità ùnica di mette in lume u nostru patrimoniu » spieca u so merre, Matteu Ceccaldi, « stu prèmiu hè una ricunniscenza di a ricchezza di a nostra stòria è di a bellezza di u nostru paese ».
Sant’Antone Abbate ch’omu chjama dinù in Corsica Sant’Antone di u porcu, suvente raprisentatu cù un porcu accant’à ellu. Per quessa dinù ch’ellu hè u Santu patrone di i pastori, i purcaghji è i salamaghji. Era un Ermitu chì hà fattu donu di tuttu ciò ch’ellu avìa per campà in a puvertà. Curava a ghjente è pè u più contr’à a malatìa di sègula, chjamata in Corsica, u focu di Sant’Antone.
Stu 23 di maghju, u sceccu di 8000 € hè statu rimessu à Matteu Ceccaldi in presenza di Christophe Depont, raprisentente di Allianz France, Damien Bigot, raprisentente di a Salvezza di l’Arte francese, Pierre-Claude Giansily, cunservatoriu di l’antichità è l’ogetti d’arte di u Pumonte, Francescu Colonna, presidente di a cumunità di e cumune di u Liamone, è ben intesu, a pupulazione di Marignana. Presente dinù a cunfraterna Sant’Antone di Marignana.
U Sant’Antone Abbatu hè una bella stàtua in legnu policromu tenuta in a ghjesgia San Ghjàcumu di Marignana, scritta à i Monumenti Stòrichi dapoi u 2016. Una fiara ind’un vasettu simbulizeghja u focu di Sant’Antone.
Evviva Sant’Antone Abbate di Marignana ! •
