3.000 à 3.500 personi, zitelli, parenti, caccari, insegnanti, militenti, anu sfilatu in carrughju stu 30 di maghju in Bastia à prò di Scola Corsa. Ma più chè a partecipazioni ci vole maravigliassi di ssi cinini ch’anu marchjatu cantendu è mughjendu à longu à tuttu u parcorsu ! Ci tènenu à a so scola. Un parente d’una ciuccia di 2 anni è mezu : « mai ùn hà pientu, hè cuntenta d’andà a scola, li piace, è ci và vulinteru ! » Un antru : « u mo figliolu mi ripiglia quandu parlu francese è m’impara cusì à parlà corsu ancu eiu. » Un antru torna : « i zitelli si càmpanu cù Scola Corsa, impàranu, travàglianu inseme, sòrtenu à scuntrà agricultori, per un dettu, sò andati à coglie castagne, ecc… Impàranu a lingua, è impàranu a Corsica. Hè magnìficu ! »
200 cumune anu deliberatu per porghje sustegnu à Scola Corsa. Vale à dì più di un terzu di e cumune di Corsica. È d’altre anu cunvucatu torna u so cunsigliu municipale. E scole assuciative d’insignamentu immersivu in lingua corsa fàcenu l’unanimità !
10.000 parsoni anu ziffratu u manifestu pè a lingua corsa sparsu da Scola Corsa.
500 imprese sustènenu Scola Corsa.
6. Tutti i parlementàrii di Corsica, vale à dì i quattru deputati, Michè Castellani, Paulu Andria Colombani, François Xavier Ceccoli, Laurent Marcangeli, è i dui senatori, Paulu Santu Parigi è Jean-Jacques Panunzi, anu scrittu inseme à u primu ministru, Sébastien Lecornu, per dumandà à u guvernu di tene e so prumesse cuncernendu Scola corsa. Li dumàndanu di « rispettà e prumesse ch’èranu state formulate cuncernendu a cuntrattualisazione generalizata di u retale vale à dì 11 posti pè a pròssima rientrata. » Dìcenu i parlementàrii : « s’agisce d’una sola misura capace di securizà definitivamente a struttura è d’andà ver di una suluzione apaciata à u ricorsu prefetturale spostu à u tribunale amministrativu dinunziendu l’illegalità di a suvvenzione di a Cullettività di Corsica. »
A lèttera dumanda « u stessu dispusitivu già in ballu ind’è l’altre regioni dapoi decine d’annate. »
Hè bellu a prima volta chì l’inseme di a classa pulìtica s’adunisce per pone una dumanda. A lingua unisce, è a dumanda di cuntrattualisazione generalizata hè una dumanda sustenuta da l’inseme di u pòpulu corsu. •
Per sustene à Scola Corsa : fate un donu
Per sapène di pù nant’à e scole immersive : www.scolacorsa.corsica
• Leghje dinù
