E scole associative d’insignamentu immersivu in lingua corsa anu un bellu successu. Creata in u 2020, Scola Corsa cresce ogni annu un pocu di più è adunisce oghje centinaie di ghjente imprimurita di tramandà a nostra lingua.
Oghje Scola Corsa conta quattru siti in Bastia, Biguglia, Corti è Sàrrula Carcupinu, òndeci classe, 11 insignanti, 11 aiute materne, 3 persunali amministrativi, quattru associ di parenti per rege e scole, una federazione è sopratuttu 200 chjome bionde ch’impàranu a so lingua è a spàrghjenu in casa !
Voi dinù, sustenite à Scola Corsa, rinfurzate a dinàmica, scrivite i vostri zitelli ! E scrizzioni pè a rientrata 2025-2026 sò aperte in e quattru scole.
Dinù, Scola Corsa s’appronta à apre un situ novu in paese di Lucciana.
Una prima classa chì accoglierà zitelli in pìccula sezziò (nati in 2022). Per impegnavvi in u prugettu o avè rinsignamenti pè e scrizzioni, pudete cuntattà : 06 29 65 76 42 – [email protected] •
« L’Associu Scola Corsa tesse un retale d’insignamentu immersivu in Corsica ispiratu da e sperienze mosse da Seaska à u Paese bascu o Diwan in Brittagna. Da a materna, sò ciuttati i zitelli in un bagnu linguìsticu permanente, à ogni stonda di a vita sculare (corsi, asgiu, ghjochi, cantina, guarderia, animazioni, surtite sculari…). Vene tuttu assestatu di modu à ch’ellu possi, u zitellu, sente è praticà a lingua nustrale.
Hè prugressivamente intrudutta a lingua francese in u corsu sculare ; l’elevi divèntanu perfettamente biplurilingui è s’àprenu cusì à d’altre culture. » •
Ghjiseppu Turchini, presidente di Scola Corsa.
