Pìu d’un mezu sèculu dopu, e 95 vìttime di a Caravelle Aiacciu-Nizza è e so famiglie averanu infine u riposu tant’aspettatu ? Un ghjùdice d’istruzzione hà avutu u curagiu pulìticu 51 dopu à a catastrofa di dì altu è forte ciò chì tuttu u mondu si dice dapoi e prim’ore di a catastrofa. A tesa d’un missile ch’averìa toccu l’aviò hè bella più chè sèria, secondu Alain Chemana. Face quattru anni ch’ellu travaglia nant’à ssu cartulare per studianne tutti i cuntorni. A dice, ma simu sempre luntani di a verità ricunnisciuta.
U ghjùdice hè stumacatu di i tràmpali è e custrinte ch’ellu hà scontru à longu à l’istruzzione. Dice l’avucatu di l’associu di difesa di e famiglie, Paulu Sollacaro, «hà u sìntimu d’esse purtatu da fole in canzone. Quand’ellu dumanda certi elementi di u cartulare, ùn hè micca abituatu à un ricusu. Puru ghjè ciò chì s’hè passatu. Parla dinù di certi scàmbii incredìbili induv’omu li dice chì ssi documenti sò ind’una cava chì minaccia di sfundassi.
Sè una persona risponde cusì à un ghjùdice, si ritrova in furia furia cù una perquisizione. »
U ghjùdice Chemana si ne và à a fine di u mese d’aostu. Forse hè per quessa ch’ellu hà vulsutu inchjudà a so cunvinzione è indità a strada à quelli chì u rimpiazzeranu, da chì omu ùn si ne volta micca in daretu dopu à ellu…
L’11 di sittembre di u 1968, u volu Air France Aiacciu-Nizza hà ciuttatu in mare tumbendu 95 personi frà e quale 13 zitelli è 6 membri di u persunale di bordu. L’inchiesta s’era chjosa senza andà più luntanu chì a tesa d’un incendiu accidentale à bordu. Puru à quell’èpica ci èranu esèrcizii militari sopr’à locu è e testimugnanze anu sempre parlatu d’un tiru di missile. Mai, in 51 anni, ùn s’hè pussutu toglie u secretu militare per studià ssa tesa a più presunta.
«Mi pare chjaru chì tutti i mezi dèvenu esse messi in ballu da capisce e càuse di ssu drama, è chì nisun tràmpalu ùn deve parà l’accasamentu di a verità ». Cusì parlava u presidente di a Repùblica, Emmanuel Macron, in risposta à una lèttera di Gilles Simeoni, in 2017. Dui anni dopu, s’aspetta sempre. Per l’associu di i parenti di e vìttime, tocca avà à u Statu di fà chì a verità schiatti in vera. Pè u riposu di quelli chì ci anu persu a vita. È pè u salutu di i soi, ch`ùn anu mai sfiatatu dapoi 51 anni, per circà di scopre a verità.
Fabiana Giovannini.
