« Ùn l’aghju mai detta à nimu, ma sta canzona l’aghju scrittu per Yvan »… cusì testimugnava Patrizia Gattaceca trè mesi fà. È sò già trè mesi ch’ellu si n’hè andatu per l’alte cime Yvan Colonna. Sparitu dopu à un atroce agressione in prigiò, l’omu u più survegliatu di Francia, ùn hà mai avutu drittu à a ghjustizia. Nè di pettu à l’accuse ch’ellu hà sempre nigatu, nè durante a so fughjita, nè di pettu à trè prucessi, nè in prigiò, nè per sorte di prigiò. Cundannatu senza prove, senza pudè fà valè e prove di a so difesa, maltrattatu à longu à 23 anni, sprezzatu di drittu pè u s’avvicinamentu, malgratu rivendicazioni da tutte e mamme è manifestazioni maiò, hè firmatu sin’à l’ùltimu soffiu, una cìbula pè u Statu. Cumu si puderà custruisce una demucrazìa senza ghjustizia nè verità ?
Sposalu stu silenziu
Scialba sti muri vioti à fiure isulane
Imbotrati di celi è d’onde è di fureste
Chì u ventu pettina
Chì u ventu pettina.
Di muschi machjaghjoli à u spunta di l’albe
Quand’ellu si sbucina u tempu d’una stagione
Di muschi machjaghjoli à u spunta di l’albe
Quand’ella si cincina a folla a to canzona.
È senti a filetta
È senti a filetta…
Dimmi un pezzu si stonda
Quandi a notte desta u ventu à tiru d’ale
Fà batte un tempurale in li mio sensi accesi
È nascenu mille fole in volu versu tè
Inventami u ricordu tessilu sinu à noi
Cum’è un granellu coltu à l’ora di a luna
Inventami u ricordu tessilu sinu à noi
Cum’è un granellu coltu à l’ora di u sole.
È senti a filetta
È senti a filetta… •
