Tristu anniversariu ssu 2 di marzu… ghjornu maladettu induve Yvan Colonna hè statu assaltatu di manera salvàtica. S’hè spentu u 21 di marzu dopu à avè luttatu contr’à e so ferite nant’un lettu d’uspidale. Yvan sarebbe vultatu in Corsica oghje chì ghjè oghje. Era u so drittu, ch’avia abbastanza pacatu per un crìmine ch’ellu hà sempre nigatu, mughjendu a so nucenza. I so assassini a sapìanu…
Patrizia Gattaceca li avia scrittu ssa bellìssima canzone per aiutalu à campà a prigiò.
Chì e so rime li pòrghjinu a pace ch’ellu hà circatu à longu à tutte st’annate d’inghjustizia.
Noi quì, aspettemu sempre ghjustizia è verità. •
Spòsalu stu silenziu
Scialba sti muri vioti
À fiure isulane
Imbòtrati di celi è d’onde è di fureste
Chì u ventu petina
Chì u ventu petina
Di muschi machjaghjoli à u spuntà di l’albe
Quand’ellu si sbucina u tempu d’una stagione
Di muschi machjaghjolu à un spuntà di l’albe
Quand’ella si cincina a folla a to canzona
Dimmi un pezzu si stonda
Quandi a notte desta u ventu à tiru d’alle
Fà batte un tempurale in li mio sensi accesi
È nàscenu mille fole in volu versu tè
È senti a filetta
È senti a filetta
