Petru Mari si n’hè andatu sta dumènica u 21 d’ottobre à l’età di 70 anni. Cù Petru hè una parte immensa di a vita oghjinca di a Corsica chì si ne và. Attore di u riacquistu di l’annate 70, era cunnisciutu da a so carriera di ghjurnalista. Animatore di a ràdiu, innamuratu di a nostra lingua è a nostra cultura, scrivanu, hà sapiutu falla entre in u nostru cutidianu, di manera naturale.
Cù i ghjochi, a puesìa, e fole è filastroche, e ghjustre paisane. Ghjurnalistà, rendìa contu di l’attualità cù prufessiunalìsimu è passione. Meditterraneanu, Petru era impregnatu di e so sponde, e so culture, e so tradizioni è sunniava d’un avvene di pace è di spartera.
Creativu è pueta anch’ellu s’hè nutritu di scambii è hà sapiutu spàrghjeli cù emissioni cum’è Mediterradio o Kantara.
Trà l’ìsule surelle di Mare Nostrum è e sponde spagnole, taliane, turche, libanese, greche o d’Àfrica di u nordu, tante culture, tante civilisazioni, tanti sapè fà, cuntati è spartuti à traversu i so viaghji è e so parulle di prufonda umanità. Eppò i so Masai chì ci fecìanu ride è ci dàvanu lezziò nant’à i cumpurtamenti di l’omu à tempu ch’elli ci amparàvanu parulle suchjulente di a nostra lingua. Rcfm, Alta Frequenza, Voce Nustrale, Radio Calvi, Via Stella è ancu Arritti anu prufittatu di u so grande talente di crunicore. Eccu un sprichju d’emissione nant’à Rcfm pè i vint’anni di Mediterradio chì conta bè ciò ch’ellu era ss’omu, e so brame è u soffiu ch’ellu hà purtatu à a nostra lotta: «Eiu stò per passà ma Mediterradio hà da cuntinuà. Hè quessa a maraviglia di l’avventura. Hè nata èramu a prima metà di l’anni 90, a Corsica riacquistava a so cultura, a s’identità, è d’una certa manera l’aspettu ancu pulìticu ben intesa.
Era una Corsica nova chì rinascìa si pò dì. U fattu stà chì ssa Corsica quì riacquistava a s’identità, si girava esclusivamente versu u passatu, vale à dì chì si nutrìa di u passatu. Quessa hè a morte.
Era una chjusura. Hè vera chì riamparàvamu ciò chè n’avìamu persu, ma ci fragàvamu a golla… Mediterradio era urgente. Àpresi à un identità aperta.
Moltu più ch’in ss’anni custì, currìa u sangue. Ci vole micca à scurdàssine.
Currìa u sangue per vìa di ssa chjusura.
Ugnunu vulìa u putere. Ugnunu vulìa esse u capu d’un muvimentu, è dunque ci simu dettu ci vole à àpresi, ci vole l’ossìgene, ci vole à apre a nostra identità, l’usciu di e finestre, ci vole chì l’aria corre, ci vole chè no èntrimu in raportu cù l’altre sponde chì ci avvicìnenu. Prima, e sponde e più vicine, e sponde itàliche, vale à dì a Tuscana, a Sardegna induve no avemu sempre campatu, induv’elle sò e nostre ràdiche… È cusì hè nata Mediterradio. »
Arritti pensa à i soi, a Ghjerumina Mari Vivarelli, a so sposa, à i so figlioli è figliulini, tutti quelli adduluriti è li manda cundugleanze afflitte è fraterne.
Riposi in pace, o amicu, in a to terra di Castagniccia.
ARRITTI.
