Terre de liens sò urganìsimi citatini in Francia chì si sò aduniti in u 2003 per « liberà a terra di a speculazione fundaria, favurizà l’accessu à a terra pè i paisani, prumove prugetti citatini per dinamizà i territorii rurali è appughjà un agricultura rispettosa di l’ambiente ».
Sò cusì 19 urganisazioni autònome chì pòrghjenu sustegnu in u so territoriu. Accumpàgnanu l’agricultori à stallassi, cunsìglianu e cullettività territuriale, sensibilizèghjanu u pùblicu è e stituzioni à i perìculi ambientali. Terre de liens hà un urganìsimu di furmazione pròpiu per sparghje cù un spìritu pupulare furmazioni, cunsiglii, arnesi, da mette in ballu un retale à u livellu territuriale, naziunale è internaziunale.
S’impegna da chì « e terre sìanu priservate è trattata cum’è bè cumunu. » Frà i so membri ci sò muvimenti chì difèndenu l’agricultura biològica, a cunfederazione paisana, ma dinù attori di a finanza èttica cum’è a sucietà cuuperativa finanziaria La Nef, associ d’educazione pupulare o di creazione d’attività ecunòmica in u rurale (Relier, Peuple et Culture…)
Dapoi u 2015, hè ricunisciutu urganìsimu à vucazione agrìcula è rurale (ONVAR) da u ministeru di l’agricultura, da prumove un alternativa à u sistema agrìculu attuale.
Terre de liens Corsica – Terra di u Cumunu hè statu creatu in ssu filu, in u 2019, è brama di « rifà di a Corsica una Terra di u Cumunu » induve tutt’ugnunu s’impegna per l’altri cum’elli a fecìanu l’antichi corsi in Cismonte à l’èpica di u medievu. Tandu e terre èranu cullettive è tutt’ugnunu s’impegnava ogni volta ch’ellu ci era u bisognu, spartèndusi dopu e racolte. St’andatura cismuntinca vene in uppusizione cù quella di u Pumonte, ch’omu chjamava Terra di i Signori. Era u duminiu di i grandi prupietarii feodali prutettori di i paisani chì travagliàvanu per elli, un pocu cum’è in Francia. Cusì si dice, ma sta raprisentazione hè cuntestata da certi sturiani. Puru, stu tèrmine di Terra di u cumunu s’hè tramandatu da sèculi, fendu sunnià.
I scopi di Terre de liens Corsica – Terra di u Cumunu sò di luttà contr’à a sparizione di e terre agrìcule, sustene l’agricultori chì cèrcanu à stallassi, incuragisce un agricultura rispettosa di l’ambiente, lucale è paisana, è ritruvà e lee trà paisani è citatini da priservà a vucazione agrìcula è pasturale di a Corsica : « A terra ùn hè micca una marcanzìa. Avemu u putere di priservà inseme a so vucazione di terra chì nutrisce. A terra hè l’affare di tutti. I paisani ùn ponu esse soli ind’è sta lotta. A nostra missione cullettiva hè di mette st’arnese à u serviziu di a Corsica, una lea trà sucietà civile è paisani ind’è u spìritu di a Terra di u Cumunu. Assicuremu a leva, a rilleva paisana. »
Frà e difficultà, l’associu s’impegna contr’à i prublemi fundarii. Face cusì operate cù u scopu di « rifà di a Corsica un giardinu », lampendu chjame à u risparmiu citatinu, per cumprà terre cù l’aiutu di u so urganìsimu fundariu è di e stituzioni corse, pò e mèttenu à a dispusizione di l’agricultori à a cundizione ch’elle ùn sìanu micca rivendute è ch’elle tèninu a so vucazione agrìcula.
Frà l’associ chì pòrtanu Terre de liens Corsica, ci hè a Fundazione Umani, Via Campagnola, l’associu per l’ambiente ABCDE, Interbio Corse, una Lenza da annacquà, Corsic’Amap. Ghjuvan’Francescu Bernardini è Vincenta Cucchi copresidèghjanu Terre de liens Corsica. Torna una iniziativa bella è generosa ! •
Infurmazioni : https://terredeliens.org/corse
