Ciò chì sprime a realità d’un pòpulu, a so lea trà e generazioni, e so brame d’avvene, più chè a cultura, hè a so lingua ! Perch’è ghjè a lingua chì face a cultura, ancu sè ben intesa ci partecipèghjanu assai a terra, e tradizioni, l’esse umanu. Ma tuttu què si sprime cù a lingua chì porta da tempi landani sin’à l’oghji è l’evuluzioni chì a scrìvenu in a mudernità, tuttu ciò chì face l’ànima d’un pòpulu.
A lingua hè u nostru tesoru. È pè a lingua, u nostru tesoru d’avvene hè l’imparera, a vuluntà di tramandala à e nove generazioni, da ch’ella cuntinueghji à fà pòpulu.
Scola Corsa hè un urdignu magnìficu da sustene è da sviluppà pè a nostra lingua, ma sopratuttu pè u nostru avvene cullettivu. Mondu ringrazii à tutti quelli chì s’impègnanu da ch’ellu campa st’associu : militenti, maestre, aiute materne, parenti, eletti, sustegni da tutte e mamme, artisti, imprese, dunatori… site a forza viva di e nostre scole !
Stu 9 di nuvembre 2024 in Biguglia, à u spaziu culturale Carlu Rocchi ch’averà sicuramente intusiasmatu da l’altru mondu quellu chì li hà datu u so nome, Scola Corsa festighjava e so scole à l’invitu di quella di Biguglia. Un appuntamentu di friscura cù tutta sta bella giuventù ! Di vede ssi zitelletti digià impegnati anch’elli dapoi quattru anni, è chì s’àprenu à a vita cù a lingua corsa cum’è mutore di a so furmazione d’omi è di donne di dumane, hè magnìficu !
Amichi lettori, cunniscite avà a vucazione di sta scola creata in u 2020 da imparà di manera immersiva è efficace a nostra lingua da ch’ella ritrovi tutta a so piazza à u senu di a sucietà corsa.
Scola Corsa hè nata da uni pochi di vuluntà, frà e quale Francescu Alfonsi ch’hà sapiutu impegnà ghjente cum’è Ghjiseppu Turchini, u presidente di a Federazione dapoi u principiu, chì face un travaglione cù tutte e squatre messe in ballu dapoi quattru anni. Troppu mondu hè disgraziosamente smenticatu ch’ùn si pò cità à tutti, ma ci vole à salutà l’impegnu cutidianu di i presidenti di e scole, quelli d’eri sempre prisenti in a vita di e scole, è quelli d’oghje impegnati dapoi un pezzu dinù cum’è Pasquale Castellani in Bastia, Ghjuvan’Michele Dominici in Biguglia, Ghjulia Cesari in Corti, Sebastianu Antoniotti in Sàrrula Carcupinu. L’impegnu maiò dinù di a direttrice, Anna Catalina Santucci, di e maestre è di l’aiute materne di tutte sse scole chì sò à u cuntattu u più strettu di i cinnini per dalli u suchju, a voglia, a forza d’amparà, di capisce più chè l’impurtanza, u piacè di campà in a so lingua da ch’ella diventi torna una lingua materna !
Stu 9 di nuvembre, avìanu tutti un invitatu di pesu, Filippu Hamel, frà i fundatori di e Calendreta, e scole immersive in lingua occitana ch’hà cuntatu più chè a stòria di sse scole, a filusufìa, a pedagugìa è i risultati di l’insignamentu immersivu, è tuttu u bè ch’ellu porta. Arritti rivenerà di sicuru à parlà di ciò ch’ellu ci ampara Filippu Hamel, à traversu sse scole immersive chì non solatimente rièscenu (i licei baschi è brittoni per un dettu sò frà i megliu nutati di Francia), ma custruìscenu belle parsoni è e rèndinu felici ! A lingua hè festa, cantu, amicizia scumpartuta, piacè ! Era cuntentu cum’un pìchju Filippu Hamel quand’ellu hà vistu affaccassi i zitelli di Scola Corsa nant’à a scena, apperlamanu, per cantà inseme di e so vuciucce stridente, pò corre dopu da pertuttu, mughjendu, scaccanendu, durante u cuncertu. Era a so serata è ne prufittàvanu, beati ! Per Filippu Hamel stu bellu intusiàsimu hè segnu d’una vera ella rièscita digià per Scola Corsa ! *
Cumpiemu ss’articulettu cù un ringraziu tamantu à tutti l’artisti ch’anu datu u so tempu è u so core per sustene e nostre scole, era una magnìfica serata, cù a partecipazione di Evelaine Fontana (animatrice), Patrizia Gattaceca, Francine Massiani, Elisa Tramoni, Romain Dominici, Michè Dominici, I Pignotti, Eppò ! Bella sulidarità chì s’hè cuncretizata dinù cù a bellìssima creazione offerta cum’è un innu à a nostra lingua ! Cù parulle di Ghjuvanni Terrazzoni, à a dumanda di Michè Dominici ch’hà scrittu a mùsica è mubilizatu uni pochi d’artisti « Scola Corsa » oghje hè dinù una canzona per fà cresce e nostre scole. Sciaccamanate à elli, è longa è bella vita à Scola Corsa ! •
Fabiana Giovannini.
* À nutà a prisenza dinù à st’appuntamentu di u presidente di l’Esecutivu Giliu Simeoni, a cunsigliera territuriale Nadina Nivaggioni, u merre di Bastia, Petru Savelli (è a so aghjunta à a lingua Mattea Lacave) è ben intesa u merre di Biguglia, Ghjuvan’Càrulu Giabiconi, è i so aghjunti frà i quali u primu aghjuntu Natale Tomasi, presente dinù Francescu Alfonsi è mondu altri sustegni, tutti impegnati assai à a rièscita di Scola Corsa.
Cum’è un innu à l’avvene, eccu stu bellìssimu cantu creatu à postu per Scola Corsa, parulle di Ghjuvanni Terrazzoni, mùsica è accunciamenti di Michè Dominici. Ci partecipèghjanu dinù Arrigu Olmeta, Eppò, Romain Dominici, Fabrice Andreani, Elisa Tramoni, Fiara Nova, l’elevi di SpartiMusica, Clement Albertini, Francine Massiani, Patrizia Gattaceca, Nicolas Giustiniani, Celestina Acquaviva, I Pignotti. Da ringraziali tutti !
« Simu felici è assai fieri di prisentavi a canzona “Scola Corsa”, ùmile petricella ch’avemu vulsutu purtà à quessu edifiziu cumunu, ch’oghje più chè mai hà bisognu di a nostra presenza. Sò tante voce intrecciate, d’omi è donne, chì spèranu di vede torna cresce è campà a nostra scola, a scola d’un pòpulu sanu » hà dettu Michè Dominici à nome di tutti.
Pudete truvà per cantala dinù u pìcculu filmettu di a canzone nant’à u situ è u retale di Scola Corsa. È spartìtelu !
SCOLA CORSA
Ad ogni passu
S’apre u chjassu
Cresce l’impegnu è a primura
Nasce u geniu di a cultura
In ogni locu
Cum’è un ghjocu
A lingua sparta à tutte l’ore
Degna si spanna in ogni core
Corsa hè Fiera d’esiste
Quessa scola chì trattene
Ciò ch’à u pòpulu li vene
Corsa hè Fiera d’esiste
Quessa scola chì mantene
U nostru tesoru d’avvene
Cum’è un bisognu
Più ch’è un sognu
Quì ogni brama piglia vita
Risponde è chjama à l’infinita
Sò mille spere
Mosse sincere
Da pudè tesse un altra vìa
Esse sè stessi in armunìa
Corsa hè Fiera d’esiste
Quessa scola chi trattene
Ciò ch’à u pòpulu rivene
Corsa hè Fiera d’esiste
Quessa scola chi mantene
U nostru tesoru d’avvene
Corsa hè Fiera resiste
Quessa scola da sustene
Pè e generazione da vene. •
Sè vo ùn ci èrate à u Spaziu Culturale di Biguglia stu 9 di nuvembre, pudete sempre sustene e scole è i so zitelli. Eccu u leame, tutti i doni sò benvenuti ! Bisognu ci hè ! www.helloasso.com/associations/scola-corsa
