Da quì à un mese festighjeremu i trè centu anni di a nàscita di Pasquale Paoli, u 6 d’aprile di u 1725 ! Ma ghjè tutta st’annata 2025 ch’omu saluterà ss’evenimentu stòricu, è sò l’annate à vene chì dèvenu capitalizà a so làscita tamanta !
L’Università di Corsica hà lanciatu e so festività, fendu rializà da l’artistu talianu Andrea Ravo Mattoni, in partenariatu cù Popularte, una fresca monumentale nant’à u muru di u casale Ghjuvanni Ìviu Coppolani, u visu di u Babbu di a Pàtria dipintu in u 1867 da Càrulu Stèfanu Petru Motte chì ripruduce magnificamente u sguardu visiunariu è determinatu d’un omu eccezziunale. U 14 di marzu scorsu l’Università chì porta cù fiertà u so nome fecìa dinù sapè u prugramma di e so festività. Ben intesa, l’Università ùn hè sola à cummemurà u Babbu, a Cullettività di Corsica, l’Accadèmia di Corsica, d’altre cullettività, cum’è a cità di Corti, associ, partiti naziunalisti, si scrìvenu in a memoria di ciò ch’ellu hà purtatu di grande è di magnìficu ss’omu ghjuntu mitu, fendu di a Corsica un splendore di u Sèculu di i Lumi.
Pasquale Paoli nasce u 6 d’aprile di u 1725 à a Stretta di Merusaglia. Una giuventù paisana ciambuttata da u cuntestu di l’èpica induve u so babbu, Ghjacintu, fù unu di i generali di a prima rivuluzione contr’à Gènova. In u 1729, schiatta l’insurezzione contr’à a Serenissima in a pieve di u Boziu, i paisani ùn vòlenu più pacà l’impòsitu. A rivolta si sparghje in Corti, a Tavagna, Bastia, u Nebbiu, a piaghja urientale, a Balagna, u Niolu, u Rustinu è sin’à in Pumonte, Aiacciu, Vicu, Sartè, Bonifaziu… tutta a Corsica hè in bullore. Di ghjennaghju 1735 in a pieve d’Orezza, una Cunsulta decide di rompe definitivamente cù Gènova. Luigi Giafferi, Ghjacintu Paoli è Andrea Ceccaldi fòrmanu un guvernu, a Vèrgine Maria hè pruclamata Regina di a Corsica, u Diu vi Salvi Regina diventa l’innu naziunale, è l’8 di dicembre, ghjornu di l’immaculata Cuncezzione, hè dettu festa di a Nazione. Cresce a ripressione genuvese chì face un blucchime di l’ìsula. Tandu s’affacca un certu Théodore di Neuhoff chì brama d’esse rè è prumette arme è appoghji pulìtichi. U 15 d’aprile 1736 hè fattu rè à u cunventu d’Alisgiani. Ma l’appoghji ùn veneranu mai… è Gènova ripiglia a suprana dopu à qualchi mese… Paoli è u so figliolu, Pasquale ch’ùn hà chè 14 anni, pàrtenu in esiliu in u 1739. A Francia vene à u succorsu di Gènova è a ripressione mena. Durante sèdeci anni trà e manate francese, genuvese, è a resistenza di i paisani corsi, a situazione ferma gattiva.
Nàpoli accoglie Pasquale chì ci face i so stùdii, scuprendu i spìriti luminosi di quell’èpica di ciambuttamenti pulìtichi, leghje i grandi filosofi è pueta, è si forma à l’arte di a guerra. U giuvanottu s’appronta à a sèguita… Volta in Corsica in u 1755. Hà 30 anni.
U 14 di lugliu 1755 hè elettu capugenerale di a Nazione corsa, l’ìsula si pruclama indipendente è principia un tempu chì maraviglia i più grandi pensatori di l’èpica. A Corsica si dà una Custituzione chì dà a parulla à u pòpulu, accetta u votu di e donne capi di famiglia, ristabilisce una ghjustizia ferma per scumbatte contr’à a criminalità. Paoli fonda L’Ìsula Rossa in u 1757, crea una marina, urganizeghja u cumerciu marìttimu, prumove a pruduzzione agrìcula, stampa muneta in u 1761, fonda l’Università in u 1765 per appruntà a giuventù à l’avvene cunvintu chì a libertà ùn pò spàrghjesi senza cunniscenza. Dice u Babbu : « ci hè assai megliu da fà chì furmà u guvernu di a Nazione, ghjè furmà a nazione pè u guvernu. »
Paoli crea dinù un ghjurnale, i Raguali dell’ìsola di Corsica per sparghje l’infurmazioni à tutti, adopra a bandera mora cum’è sìmbulu di a Nazione, stampa muneta è multiplicheghja i cuntatti cù i grandi spìriti di l’èpica. Rousseau scrive per ellu u so Prugettu di Custituzione pè a Corsica. Voltaire, Goethe, Frederic II, pàrlanu d’ellu cù maraviglia. Si face cunnosce in tutta l’Auropa da e so prudezze è i so benfatti pè u so pòpulu.
In u frà tempu, scumbatte sempre contr’à i Francesi è i Genovesi, piglia l’ìsula di Capraia in u 1767. I Francesi zìffranu un trattatu in Versailles cù Gènova in u 1768… Tandu, Paoli cummenta : « ùn si sà quale odie u più, quelli chì ci còmpranu o quelli chì ci vèndenu ». E culonne infernale di i Marbeuf, Chauvelin, De Vaux… spàrghjenu viulenza è martòriu. Malgratu a vittòria corsa in Borgu d’ottobre 1768, l’indipendenza corsa si spènghje in Ponte Novu l’8 è u 9 di maghju di u 1769…. Paoli parte in esiliu in Inghilterra è una ripressione tremenda mena i Corsi sin’à a rivuluzione francese di u 1789.
Paoli hè accoltu cum’un eroe da l’assemblea custituante francese. Volta ind’è l’ìsula acclamatu da u so pòpulu u 14 di lugliu 1790… ma ùn ghjunghjerà à fassi à a pulìtica di i giacubini francesi chì scàpanu l’uppunenti è ùn accunsèntenu micca à u statutu specìficu ch’ellu dumanda. Paoli hè dettu tradittore è for’di lege da a Cunvenzione in u 1796. Riparte in esiliu in Londra induv’ellu si spenghje u 5 di ferraghju 1807 à l’età di 81 anni.
Vulteranu e so cènere dui sèculi dopu. Riposa oghje in u so paese di Merusagliu. In Londra, munumenti fèrmanu à a so gloria, dinù in Amèrica induve cità pòrtanu u so nome. In parechji paesi d’Auropa, e so prudezze sò salutate.
Trè sèculi dopu à a so nàscita, i naziunalìsti è a giuventù corsa ùn ponu rende più bellu umagiu chì quellu di strappà ssu « statutu specìficu » ch’ellu bramava à ottene da a Francia in u 1794. Strappà l’autunumìa è ghjòvesine per custruisce un avvene di pace è di prusperità pè a Corsica sarebbe un magnìficu sìmbulu di a gloria chì l’hà cugnumatu à l’eternu Babbu di a Pàtria !
L’umagiu di l’Università : https://www.universita.corsica/fr/300-anni-pasquale-paoli/
L’umagiu di a Cullettività di Corsica (in corsu d’elaburazione) : https://www.isula.corsica/Prugramma_a5271.html
L’umagiu di l’Accademia di Corsica : https://www.ac-corse.fr/paoli2025
E principale date di u U Babbu
1725 u 6 d’aprile, nàscita
1739 u 7 di lugliu, partenza in esiliu in Nàpoli
1755 u 14 di lugliu, elettu Capugenerale di a Nazione
1765 u 3 di ghjennaghju, apre l’Università di Corsica
1769 8 è 9 di maghju, disfatta di Ponte Novu
1790 14 di lugliu, ritornu in Corsica, sbarca in Macinaghju
1795 14 d’ottobre, partenza in esiliu in Londra
1807 5 di ferraghju, more in Londra ripusendu in Westminster
1889 4 di sittembre, ritornu di e cènere di Pasquale Paoli in Corsica. •
