U Brasiliu pò simbulizà a maiò parte di e disgrazie di ssu mondu. Brùsgia è pienghje l’Amazunìa, simbulizendu à tempu u scumpientu di u riscaldimentu climàticu è i so perìculi, u disprezzu di l’ambiente è di i pòpuli è culture autoctoni di pettu à u soldu rè, e scelte di un agricultura intensiva cundannendu a natura è a so biodiversità, è ancu a salute di l’omi, l’aberrazioni di e nostre sucetà chì vanu à circà quallà di chè manghjà carna tutti i ghjorni pruvuchendu ssu bisognu di terre per l’allevu è l’incendiu di e fureste. Soffre u pòpulu brasilianu in e so cumpunente e più pòvere di e favelas, soffre di fame, di malèssere, di demucrazìa sprezzata, simbulizendu e puvertà di ssu mondu. More a so ghjuventù sott’à e pistulettate è i tràfichi di e màffie, ma dinù sott’à e derive di a pulizza corrotta è mai perseguitate pè i so crìmini, simbulizendu l’offese permanente di l’omi contr’à l’omi. Strazieghja a ghjente di pettu à ssa demucrazìa inghjuliata è i diritti di l’omi calpighjati. S’affoca a verità, sott’à e bugie di u Statu, di pettu à u Covid ch’hà fattu già più di 121.300 morti, simbulizendu e catastrofe di gestione pulìtica di ssa crisa sanitaria. Ma dinù hè calpighjata a verità di pettu à i fochi criminali è a pèrdita di un patrimoniu naturale mundiale mentre chì u presidente Bolsonaro hà parlatu di « bugìa » di pettu à i capifili di i paesi d’Amèrica Latina u 12 d’aostu scorsu. Eppuru ! 10.136 fochi sò stati picciati i deci primi ghjorni d’aostu, sìa una aumentazione di 17 % per raportu à 2019. A sfurestazione hà guadantu 9.205 chilòmetri quadrati trà aostu 2019 è lugliu 2020, sìa un aumentazione di 34,5 % ! Pòveru Brasiliu ! Pòvera pianetta ! U 22 d’aostu 2020, u mondu hà francatu u « ghjornu di u rivoccu », vale à dì u ghjornu di u troppu stroppia induve l’omu hà già cunsummatu tutte e capacità di a pianetta per dà di pettu à i so bisogni d’un annata… Vale à dì torna, i quattru mesi chì fèrmanu per compie ss’annata sò mesi induve campemu à creditu. Ci hè bisognu d’una pianetta vìrgula sei da pudè risponde à tutti i nostri bisogni…
Da pudè fà rinculà ssu troppu stroppia, ci tocca à cambià di versu è in furia. Un pianu massivu di l’alloghji da fà calà a so cunsummazione energètica, da scaldali o rinfriscali menu, generalizà i modi di trasporti durèvuli (trenu, trasporti in cumunu, bicicletta, vitture elèttriche o ibride…), sustene l’impiecu in e pruduzzioni d’energìe rinuvelèvule da pudè riduce di più in più in furia a cunsummazione d’energìe fussile, spiccà u lozzu è pè u più u lozzu fermentèvule chì fabricheghja a terra per ghjunghje torna à u più in furia à u zeru frazu, piantà a sfurestazione sfrinata, priserve e risorze è a biodiversità di a pianetta… ùn sò capatoghji, ma ubbiettivi chì cuntrarièghjanu solu e multinaziunale. Pudemu ghjùnghjeci. We can ! Smizà solu in dui a nostra cunsummazione di carna è u nostru frazu alimentariu ci ferebbe guadagnà un mese nant’à u ghjornu di rivoccu.
Bona rientrata à tutti !
