Hè cunnisciutu in Vicu un bancalaru chì par cantà a paghjella, ùn trova u so paru : Bastianu Chiappini, artisgianu muturizatu, omu di bell’umore. Di numallu m’hà autorizatu. Accantu à ellu era lughjatu un gran’riccone, un veru disgraziatu. Affannatu in li so conti, u fècatu diffittosu, nè notte nè ghjornu pudìa truvà riposu.
Una matina, stu Sgiò… ùn sò più quale, fece chjamà à l’amicale, u nostru cantadore par dumandalli u sicretu di sta bon’umore :
– O’micu… par cantà cum’è vo cantate, si vede chì i soldi guadagnate à palate…
– Soldi ? À chì paca à mità, à chì paca à prumittera, ognunu i chjodi i ficca à a so manera, à chì vole a qualità, à chì dumanda u bon’marcatu, ma ch’ellu ùn si parli d’esse pacatu.
– O cumpà, tinè issi trenta maranghini1, vi ponu serve. Ma piattàteli chì vò ùn l’avìssite da perde.
À quelli tempi, duie pezze d’oru è trè duppiò vi dàvanu drittu à u tìtulu di Sgiò. Pien’di meriti è disgraziatu firmàvate « u figliolu di u tale », cù trè pezze d’oru, divintàvate u Sgiò Pasquale…
Cridite chì i Chiappini divintonu fieri ? Vi sbagliate : da stu ghjornu cummincionu i pinseri… U bel’cantadore era ammutulitu, ùn magnava più nulla, mancu caprettu arristitu.
Dopu à un mese di sta vita di strega, era divintatu magru cum’è una sega. È pò, un bellu ghjornu, u ciarbellu à a ritrosa, andede à truvà stu Sgiò… ùn sò più cosa :
– O Sgiò… i vostri maranghini i v’aghju vultati. Què sò cose da fà perde u ciarbellu à i disgraziati. Di sta robba in casa meia Dìu mi guardi, a me cascia da mortu, a vogliu fà più tardi.
Dipoi Bastianu riprese u travagliu è i so guai, è sì vo sintite cantà, canta megliu cà mai…
Muralità
Sì vo fate un rigalu,
Date legnu à un bancalaru,
Farru à un stazzunaru,
Coghju à un scarparu…
Ma sì e vedettes di a télé scuntrate,
Cinquanta maranghini, chì si pudarìanu tace… •
- Maranghinu : anziana pezza d’oru di vinti franchi.
